Plastıkalyq ota jasatqan áıeldiń ólimi neden bolǵany anyqtaldy
ALMATY. QazAqparat - Almaty qalalyq qoǵamdyq densaýlyqty saqtaý departamenti plastıkalyq otadan keıingi áıel ólimine qatysty túsinikteme berdi, dep habarlaıdy QazAqparat tilshisi.
Quzyrly organ ókilderi onyń 3 qyrkúıekte Ortalyq klınıkalyq aýrýhanada qaıtys bolǵanyn rastady.
30 jastaǵy áıel jekemenshik emhanalardyń birinde omyraýyn tarttyrmaq bolǵan. Áıel mastopeksııa otasynan keıin arada bir aı ótkende qaıtys boldy.
«Ol aýrýhanaǵa sirespe sındromymen túsken. Áıel adamnyń aǵzasynda jansyzdandyrý quralyna (anestezıologııa) reaktsııa bolǵan. Barlyq materıaldar ІІD-ge ótkizildi. Departament protsessýaldyq tártipte saraptama taǵaıyndamaq. Sonyń nátıjesinde otanyń barlyq mán-jaıy anyqtalady», - dedi departament basshysy Aızat Moldaqasymova.
Aldyn-ala aqparat boıynsha, marqum áıel otany «NOA Plastıkalyq jáne lazerlik kosmetologııa» emhanasynda jasatqan.
Emhana basshylyǵy bizge túsinikteme berýden bas tartyp otyr.
Esterińizge sala keteıik, 30 jastaǵy áıeldiń plastıkalyq otadan soń kóz jumǵanyn ótken apatada habarlaǵan bolatynbyz.
Osyndaı qaıǵyly jaǵdaı Almatyda eki jyl buryn da bolǵan edi. Ýkraına azamatshasy Dana Agamuradova lıposaktsııa (ish maıyn alǵyzý) jasatpaq bolyp, jekemenshik emhanalardyń birinde ota jasatqan. Alaıda áıel otadan keıin esin jımaǵan kúıi dúnıeden ótti. Qazir ota jasaǵan hırýrg Dmıtrıı Pısarev sot aldynda jaýap berip jatyr.
