Plastıkalyq hırýrgııa klınıkalaryna 244 adam shaǵymdanǵan: qandaı zańbuzýshylyqtar anyqtaldy
ASTANA. KAZINFORM — Sońǵy alty jylda Densaýlyq saqtaý mınıstrliginiń estetıkalyq medıtsına jáne plastıkalyq hırýrgııa klınıkalarynda júrgizgen jospardan tys tekserýleri barysynda adam ólimine ákelgen tórt jaǵdaı jáne patsıent densaýlyǵyna aýyr zııan keltirýdiń bir deregi tirkelgen. Qazaqstandyqtar qandaı máselelerge jıi shaǵymdanady jáne tekserýler kezinde qandaı zańbuzýshylyqtar anyqtaldy? Kazinform tilshisi osy máselege qatysty resmı derekterdi zerdelep kórdi.
Medıtsınalyq jáne farmatsevtıkalyq baqylaý komıtetiniń Medıtsınalyq qyzmetti jospardan tys baqylaý basqarmasy agenttiktiń resmı saýalyna bergen jaýabynda tekserýler qorytyndysy men anyqtalǵan zańbuzýshylyqtarǵa qatysty málimet usyndy.
Komıtet málimetinshe, 2021 jyldan beri plastıkalyq hırýrgııa klınıkalarynda 92 jospardan tys tekserý júrgizilgen.
— Eń kóp qoǵamdyq rezonans týdyrǵan jaǵdaılar Almaty jáne Astana qalalarynda, sondaı-aq Mańǵystaý oblysynda tirkeldi. Atalǵan óńirlerde osy kezeń ishinde adam ólimine ákelgen tórt jaǵdaı jáne patsıenttiń densaýlyǵyna aýyr zııan keltirýdiń bir deregi tirkelgen. Árbir oqıǵa boıynsha táýelsiz sarapshylar tartylyp, jospardan tys tekserýler júrgizildi. Materıaldar quqyqtyq baǵa berý úshin quqyq qorǵaý organdaryna joldandy, — delingen basqarma jaýabynda.
Sonymen qatar, 2023–2025 jyldary Medıtsınalyq jáne farmatsevtıkalyq baqylaý komıtetine estetıkalyq medıtsına jáne plastıkalyq hırýrgııa klınıkalarynyń jumysyna qatysty shaǵymdar túsken.
Osy kezeńde komıtetke 244 azamat júgingen. Patsıentter kóbine kórsetilgen medıtsınalyq qyzmettiń sapasyna, operatsııa nátıjesine jáne operatsııadan keıingi asqynýlarǵa shaǵymdanǵan.
Shaǵymdardyń eń kóbi 2024 jyly túsken. Sol jyly 32 klınıkada jospardan tys tekserý júrgizilgen.
Alty jylda qandaı zańbuzýshylyqtar anyqtaldy
2021 jyldan beri júrgizilgen 92 jospardan tys tekserýdiń qorytyndysy boıynsha Densaýlyq saqtaý mınıstrligi mynadaı zańbuzýshylyqtardy jıi anyqtaǵan:
* medıtsınalyq qyzmetti tıisti lıtsenzııasyz nemese lıtsenzııaǵa qosymshasyz kórsetý;
* medıtsınalyq kómekti uıymdastyrý standarttarynyń buzylýy;
* operatsııa aldyndaǵy tekserý men anestezıologııalyq súıemeldeýdegi kemshilikter;
* medıtsınalyq qujattardy júrgizý jáne patsıenttiń aqparattandyrylǵan kelisimin rásimdeý talaptarynyń buzylýy.
Aıta keteıik, mamyr aıynda plastıkalyq operatsııa kezinde bolǵan eki ólim jaǵdaıy belgili boldy.
21 mamyrda Almatyda bloger ári kásipker Saýle Bazarhannyń jergilikti jansyzdandyrý arqyly jasalǵan lıposaktsııa kezinde kóz jumǵany habarlandy.
Al 22 mamyrda Mańǵystaý oblystyq máslıhatynyń burynǵy depýtaty Erbol Aıtýovtyń ıek astyndaǵy artyq maıdy alý operatsııasynan keıin kóz jumǵany belgili boldy.
