Plastık jahandyq jylynýǵa sebepshi bolatyny anyqtaldy - ǵalymdar
ASTANA. QazAqparat - Plastık qorshaǵan ortany lastap qana qoımaı, janýarlar men adamdarǵa qaýip tóndirip, klımattyń ózgerýine yqpalyn tıgizetini anyqtaldy, dep habarlaıdy BUU-nyń Qorshaǵan orta jónindegi baǵdarlamasy Gavaıı ýnıversıtetinde ótkizilgen jańa zertteýdiń málimetterine silteme jasap.
Ǵalymdardyń anyqtaýynsha, plastık kún radıatsııasynyń yqpalymen ydyrap, metan men etılenniń parnıktik gazdarynyń qospasyn bóledi. Munymen qoımaı, emıssııanyń kólemi ýaqyt óte kele ulǵaıa beredi.
Zertteýshiler qurylys materıaldarynda, matalarda, plastıktan jasalǵan buıymdardyń quramynda bolatyn birqatar materıaldardy synaqtan ótkizdi.
«Testileý nátıjesinen belgili bolǵandaı, plastık klımatqa áser etetin gazdyq qospalardy bóledi. Plastmass buıymdardy óndire bergen saıyn jáne qorshaǵan ortada neǵurlym plastık bolsa, soǵurlym bul emıssııalardyń kólemi de ulǵaıa beredi», delingen habarlamada.
Zertteýshiler ásirese tsellofan paketterdiń qaýipti ekenin erekshe atap ótti. Sebebi onyń quramynda metan men etılenniń belsendi kózderiniń biri - polıetılen bar. 1950 jyldan bastap 8 mıllıardtan astam plastık paketter daıyndalǵan. Aldaǵy 20 jyl ishinde jyl saıynǵy óndiris kólemi eki ese ulǵaıady dep kútilýde.
Zertteýshilerdiń pikirinshe, olardyń ashqan jańalyqtary jahandyq jylynýdy týdyrýǵa yqpalyn tıgizetin plastıkti paıdalanýmen kúresý qajet ekenin rastaıdy.
