Plastık terezelerdi qysyp ashqan urylar ustaldy - Astana ІІD
ASTANA. QazAqparat -Astana qalasynyń ishki ister departamenti jeltoqsan aıynda qolǵa túske urylardyń sanyn jarııalady. Olardyń barlyǵy jaldamaly páterlerde turǵan. Almaty men Shyǵys Qazaqstan oblystarynyń urylary toptasyp júrse, basqa qalalardan kelgender ózdigimen «nápaqa» taýyp júrdi, dep habarlaıdy QazAqparat tilshisi.
Almaty oblysynyń 4 turǵyny páter kiltterin sáıkestestendirý jáne qulyptardy buzý arqyly 8 páterge túsip úlgergen. Kúdiktiler Abaı dańǵylyndaǵy jaldamaly páterde eki aı boıy turǵan.
Al, Shyǵys Qazaqstan oblysynan kelgen «gastroler» urylar plastık terezelerdi qysyp ashý arqyly tórt úıdi tonady. Olar da jaldamaly páterde boı tasalap júrdi. Aqtóbe oblysynyń turǵyny jalǵyz ózi tórt birdeı urlyq jasaǵan. Aqmola oblysynyń týmasy odan asyp, alty páterdiń zattaryn úptep ketken.
«Tártip saqshylary quryqtaǵan urylardyń ishinde Taraz, Aıagóz, Atyraý, Aqtóbe, Ekibastuz,Semeı, Kókshetaý, Temirtaý, Qostanaı, Ońtústik Qazaqstan, Aqmola, Almaty jáneJambyl oblystarynyń turǵyndary bar. Barlyǵy Astananyń ár jerinde ornalasqan jaldamaly páterlerde turdy», - delingen resmı habarlamada.
