Plastık qaldyqtaryna qarsy kúres: halyqaralyq kelisimniń jańa formaty engizildi
ASTANA. KAZINFORM — Qazaqstan plastıkpen lastanýǵa qarsy kúres jónindegi jahandyq kelisimdi ázirleýge arnalǵan beıresmı kezdesýge qatysty
Kenııanyń Naırobı qalasyndaǵy Birikken Ulttar Uıymynyń bólimshesinde plastıkpen lastanýǵa qarsy kúres jónindegi halyqaralyq zańdy kúshi bar kelisimdi ázirleý maqsatynda qurylǵan Úkimetaralyq kelissózder komıtetine qatysýshy memleketter delegatsııalary basshylarynyń beıresmı kezdesýi ótti.
Kezdesýge Qazaqstan Respýblıkasy Ekologııa jáne tabıǵı resýrstar vıtse-mınıstri Jomart Álıev bastaǵan Qazaqstan Respýblıkasynyń delegatsııasy qatysty. Delegatsııa bolashaq halyqaralyq kelisimniń negizgi baǵyttary boıynsha elimizdiń ustanymdaryn usynyp, memleketterdiń kózqarastaryn jaqyndastyrýdyń yqtımal joldaryn talqylaýǵa belsendi qatysty.
Atalǵan kezdesý bıylǵy aqpan aıynda saılanǵan Úkimetaralyq kelissózder komıtetiniń tóraǵasy usynǵan jańa jumys formatyna baılanysty erekshe mańyzǵa ıe boldy. Dástúrli kelissózderden aıyrmashylyǵy, pikirtalastar beıresmı formatta uıymdastyrylyp, qujat mátinin kelisýge emes, pikir almasýǵa, memleketterdiń ustanymdaryndaǵy ortaq tustardy aıqyndaýǵa jáne bolashaq kelisimniń eń kúrdeli máseleleri boıynsha ózara tıimdi ymyraly sheshimder izdeýge baǵyttaldy.
Talqylaý qorytyndysy boıynsha memleketterdiń usynystary men ustanymdaryn jınaqtaıtyn anyqtamalyq qujat ázirlenedi. Bul qujat 2026 jylǵy qyrkúıekte ótetin beıresmı konsýltatsııalarǵa, sondaı-aq aldyn ala 2027 jylǵy naýryzǵa josparlanǵan Úkimetaralyq kelissózder komıtetiniń qaıta jalǵasatyn besinshi sessasyna (ÚKK-5.2) daıyndyqtyń negizi bolady.
Qazaqstan plastıkpen lastanýǵa qarsy kúres jónindegi tıimdi ári teńgerimdi halyqaralyq kelisimdi ázirleý maqsatyndaǵy kelissózder protsesine belsendi qatysýyn jalǵastyrady.
Aıta ketelik Atyraýda plastık qaldyqtardy qaıta óńdeıtin zaýyt ashylady.
