Plasıdo Domıngonyń qatysýymen ótetin kontsertke barlyq bılet satylyp ketti
ASTANA. QazAqparat - 1 jáne 3 tamyz kúnderi «Astana Opera» sahnasynda ótetin Dj. Verdıdiń «Travıata» operasyna barlyq bılet satylyp ketti, dep habarlaıdy «QazAqparat» HAA tilshisi.
«1 jáne 3 tamyz kúnderi Maestro Plasıdo Domıngonyń qatysýymen ótetin «Travıataǵa» barlyq bılet satylyp ketti», - dep málimdedi teatr dırektory Ǵalym Ahmedıarov.
Onda «Opera koroli» atanǵan Plasıdo Domıngo Jorj Jermonnyń rólin somdaıdy.
Degenmen, astanalyqtar qazirgi zamannyń áıgili mýzykantyn «Operalııa» 25-shi dúnıejúzilik opera baıqaýynyń fınalynda kóre alady. 29 shilde kúni baıqaýdyń aqtyq saıysynda jeńisten úmitti bolǵan 10 oryndaýshy Plasıdo Domıngo basqaratyn sımfonııalyq orkestrdiń súıemeldeýimen óner kórsetedi.
Eske sala ketsek, baq synaýshylar arasynda tórt qazaqstandyq ártis bar, olardyń biri - «Astana Operanyń» jetekshi solısi, halyqaralyq baıqaýlardyń laýreaty Marııa Mýdrıak.
Plasıdo Domıngo oryndaýdan keıin bıske shaqyrý (101 ret) jáne aýqymdy repertýary boıynsha Gınnestiń rekordtar kitabyna engen. 2016 jylǵa deıin ol 147 róldi somdap, álemniń úzdik sahnalarynda 3800 ret óner kórsetken. 500 ret maestro dırıjerlik pýltti basqaryp, júzden astam fılm, aýdıo jáne beınejazbalardyń túsirilimderine qatysqan.
