Plasıdo Domıngo «Travıata» spektaklinde óner kórsetpek

 Bul týraly«Astana Opera» teatrynyń baspasóz qyzmeti habarlady.

Álemdegi úzdik sopranolardyń biri Marına Rebeka (Latvııa) men belgili qazaqstandyq tenor, «Astana Operanyń» jetekshi solısi Medet Shotabaev Dj.Verdıdiń «Travıata» spektaklinde Jorj Jermon partııasyndaǵy qazirgi zamanǵy uly opera ánshisi Plasıdo Domıngonyń qatysýymen Vıoletta men Alfredtiń basty partııalaryn oryndaıdy. Dırıjeri - AQSh-tan kelgen ataqty maestro ıÝdjın Kon. Bul jarqyn mádenı is-shara Qazaqstan Respýblıkasy Mádenıet jáne sport mınıstrliginiń qoldaýymen «EKSPO-2017» baǵdarlamasy aıasynda ótedi.

Plasıdo Domıngo Marına Rebekany sońǵy 50 jyl ishinde Vıoletta partııasyn úzdik oryndaýshylardyń biri dep ataǵan. Onyń qorjynynda Verdı jaýharlarynyń 15-ten astam túrli qoıylymy bar, al onyń álem boıynsha opera teatrlarynda bul róldi ózinshe jetkize bilýi osy beıneniń tolyqqandy ári dál berilýi bolyp sanalady. 

Álemdik opera juldyzy Marına Rebeka óziniń minsiz akterlik sheberligi, erekshe keń tynysty daýys yrǵaǵy, sondaı-aq  daryndylyǵy men sahnada kórsete biletin súıkimdiligi arqasynda talǵampaz kórermen men qatań synshylardyń júregin jaýlaı aldy. Ol únemi úzdik halyqaralyq sahnalarda óner kórsetedi.

 «Travıata» spektakli ataqty ánshiniń keń aýqymdy repertýarynda erekshe oryn alady.

- Men bul partııany jaqsy kórem, onyń ereksheligi - keremet vokaldyq daǵdylardy talap etýmen qosa, akterlik oıyn úshin aýqymdy keńistik qaldyrady. Vıoletta beınesinde túrli reńk pen san qyrlar bar, árbir óner kórsetýde meniń keıipkerim alýan túrli, biraq ne istese de, únemi shynaı ári adal. Maestro Domıngomen birge kóptegen qoıylymdarǵa qatystym. Bul bir erekshe tájirıbe, sahnadaǵy is-qımyl kezinde ózara túsinistik pen sıqyrly kúsh paıda bolary anyq. Ol tańǵajaıyp sahnalyq seriktes - emotsııaǵa óte berilgish ári myqty. Osy oqıǵany sahnada qaıtadan bastan keshýge ázirmin. Tyńdarmanǵa usynatyn spektaklimiz unaıdy dep senemin, - dep atap ótti Marına Rebeka.

Vıolettanyń ǵashyǵy Alfred partııasyn tanymal vokalıst, shetelde talap etiletin qazaqstandyq ártisterdiń biri, Qazaqstannyń eńbek sińirgen qaıratkeri Medet Shotabaev oryndaıdy. «Astana Operanyń» jetekshi solısi Italııa, Shveıtsarııa, Avstrııa, Slovakııa, Frantsııa, Belgııa, Nıderlandy, Brazılııa, AQSh, Kanada jáne taǵy basqa elderge gastrolmen jıi shyǵady. Onyń ústine, ártisti ár elde onyń shyǵarmashylyǵynyń shynaıy jankúıerleri asyǵa kútýde. Jaqynda ǵana ánshi belkanto stıliniń jaýhary - Vınchentso Bellınıdiń "Norma" operasynda basty partııa Pollıondy 14 spektaklde oryndaǵan ataqty Graz Opera (Avstrııa) sahnasynda oryndap shyqty.

Ataqty Amerıka dırıjeri ıÝdjın Kon Renata Tebaldı, Djýzeppe Dı Stefano, Franko Korellı, Marııa Kallas, Renata Skotto, Lýchano Pavarottı jáne ózge de aty ańyzǵa aınalǵan vokalıstermen birge óner kórsetýi arqyly kópshilikke keńinen tanymal. Sońǵy 25 jyl ishinde Plasıdo Domıngomen tyǵyz baılanysta jumys jasaýda - birlesken spektaklder, kontserttik baǵdarlamalar, sonymen qatar kóptegen CD jáne DVD-dısk jazbalary osynyń kýási. Sondaı-aq 2008 jyldan bastap ıÝdjın Kon klassıkalyq jáne tanymal mýzyka janrynda jumys jasaıtyn belgili ıtalııalyq ánshi Andrea Bochellımen birge qyzmet atqarýda. 2002 jyly F. Dzeffırellıdiń «Kallas navsegda» fılminde maestronyń akterlik debıýti oryn aldy, atalǵan kartınada opera bulbuly Marııa Kallastyń kontsertmeısteri bolǵan kezdegi óziniń rólin somdaǵan.

Astanadaǵy qoıylym kúnderi Flora Bervýa partııasyn Horvatııanyń jas talantty ánshisi Sandra Plamenats oryndaıdy. Qonaqtarmen birge sahna tórine «Astana Opera» teatrynyń solısteri shyǵady, olar: baron Dıýfol - Evgenıı Chaınıkov, markız d'Obını - Baýyrjan Ánderjanov («Astana Opera» / Essendegi Aalto mýzykalyq teatry, Germanııa), Annına - Elena Ganja, Doktor Grenvıl - Shyńǵys Rasylhan, Gaston - Halıd Nuralıev, Djýzeppe - Ramzat Balakıshıev, Komıssıoner - Nurlybek Qosbarmaqov. Sonymen qatar qoıylymǵa «Astana Opera» sımfonııalyq orkestri men hory qatysady, bas hormeısteri - Qazaqstannyń eńbek sińirgen qaıratkeri Erjan Daýtov.

Eske salar bolsaq, Dj.Verdıdiń «Travıata» operasynyń lıbrettosyn A.Dıýma-ulynyń «Kamelııa ustaǵan hanym» romanynyń jelisi boıynsha Franchesko Marııa Pıave jazǵan bolatyn. Tanymal «Aınalar travıatasynyń» qoıýshy rejısseri - Hennıng Brokgaýz (Italııa), sýretshi stsenografy - Iozef Svoboda (Chehııa), kostıým sýretshisi - Djankarlo Kolıs (Italııa).

Spektaklderdiń bastalýy saǵat 19.00-de.