Plagıat jasap, án urlady dep aıyptalǵan Ed Shıran sotta jaýap berdi
Thinking Out Loud - Shırannyń eń tanymal shyǵarmalarynyń biri, ol YouTube-ta 1 mıllıardtan astam márte qaralǵan.
32 jastaǵy Shırandy azamattyq protseste Marvın Geıdiń teń avtory Ed Taýnsendtiń muragerleri kýálik etýge shaqyrdy.
Olar brıtan juldyzyn avtorlyq quqyqty buzdy dep aıyptap, onyń 2014 jylǵy hıtiniń áıgili trekten «aınymaıtynyn» málimdedi.
Dálelderdiń biri - Shıran tyńdarmandarynyń 2014 jylǵy kontsertte túsirgen vıdeosy, onda ol eki ándi qatar oryndaıdy.
Ánshiniń advokattary vıdeony sotta qoldanýǵa qarsy bolǵanymen sýdıa ruqsat etti.
Aıyptaýshy taraptyń zańgerleri bul vıdeony «Shırannyń plagıatty moıyndaýy» dep atady.
Sotta ánshi kontsertterinde bar bolǵany ánderdi aralastyryp aıtatynyn málimdedi.
«Mysaly Let It Be-den No Woman No Cry-ge aýysamyz jáne sol sııaqty.. Sahnada 20 000 adamnyń aldynda turyp, osylaı plagıat jasasam, aqymaqtyq bolar edi», - dep jaýap berdi Shıran aıyptaýlarǵa.
Mine, álgi eki án. Ózińiz baǵalańyz:
Sotqa aryz 2017 jyly túsken, sot otyrysy eki aptaǵa sozylady dep kútilip otyr.
Ed Shıran plagıat týraly shaǵymdarǵa birinshi ret tap bolyp otyrǵan joq.
2016 jyly oǵan ataqty «Photograph» áni urlanǵan degen aıyp taǵyldy. Martın Harrıngton men Tom Leonard bul kompozıtsııa The X Factor baıqaýynyń jeńimpazy Mett Kardl úshin jazylǵan «Amazing» ánine tym uqsas dep málimdedi. Olar Shırannan 20 mıllıon dollar talap etti.
Іs sol jyldyń sáýir aıynda bizge beımálim somamen sheshildi.
2022 jyly Shıran 2017 jylǵy Shape Of You hıtine qatysty sotta jeńiske jetti. Ol kezde ánshi Samı Chokrı men Ross O'Donohıýdiń 2015 jylǵy Oh Why ánin kóshirdi dep aıyptaldy.
«Sóz tirkesteriniń arasynda uqsastyq bolǵanymen, aıtarlyqtaı aıyrmashylyqtar bar», - dep atap ótken sýdıa Shırandy kinásiz dep jarııalady.
