Pııaz ishine esirtki jasyryp, túzetý mekemesine ótkizbek bolǵan aqtóbelikter ustaldy
AQTÓBE. QazAqparat – Aqtóbede túzetý mekemesine esirtki men uıaly telefon, sim kartany jasyryn túrde ótkizbek bolǵan aqtóbelikter ustaldy, dep habarlaıdy QazAqparat tilshisi.
Aqtóbede QAJ departamentine qarasty KA-168/1 mekemesiniń jáne kúzet bóliminiń qyzmetkerleri mekemege kelgen sálemdemeni tekserdi. Onda pııaz ishine muqııat jasyrylǵan 2 uıaly telefon, sim karta jáne salmaǵy 10,07 gramm bolatyn gashısh esirtki zatyn tárkiledi.
«Aqtóbe oblysynyń 32 jastaǵy turǵyny tyıym salynǵan zattardy tanysyna ótkizbek boldy. Al tanysy qazir Qylmystyq kodekstiń «Bopsalaý» babymen kúdikti-aıyptalýshy bolyp túzetý mekemesinde otyr. Pııaz ishine jasyrylǵan túıinshek saraptamaǵa jiberilip, jasyl tústi ósimdik tektes zattyń salmaǵy 10,07 gramm bolatyn gashısh esirtki zaty ekeni anyqtaldy. Qazirgi ýaqytta tyıym salynǵan zatty mekemege ákelýshi kúdiktige qatysty Qylmystyq kodeksiniń 296-baby 2-bóligi boıynsha is qozǵaldy»,- deıdi Aqtóbe oblysy boıynsha QAJ departamentiniń bastyǵy Rýslan Orazbaev.
Aqtóbe oblysy boıynsha QAJ departamentiniń baspasóz qyzmetiniń habarlaýynsha, 24 jastaǵy turǵyn pııazdyń ishine muqııat jasyrylǵan uıaly telefon men sim kartany Qylmystyq kodekstiń «Qarjylyq pıramıdany qurý jáne oǵan basshylyq etý» baby boıynsha kúdikti- aıyptalýshy tanysyna jetkizbek bolǵan. Quqyq buzýshyǵa QR ÁQBtK-niń 791 jáne 795-baptary boıynsha hattama toltyrylyp, is Aqtóbe qalasynyń mamandandyrylǵan ákimshilik sotyna joldanǵan. Zańmen belgilengen tártipti buzýshy sot sheshimine sáıkes aıyppul arqalaýy múmkin.
