Pııaz eksportyna salynǵan tyıym alyna ma – Serik Jumanǵarın jaýap berdi

ASTANA. QazAqparat – Premer-Mınıstrdiń orynbasary – Saýda jáne ıntegratsııa mınıstri Serik Jumanǵarın pııazdy elden shyǵarýǵa qoıylǵan tyıymdy alý máselesi Úkimettiń kún tártibinde joq ekenin aıtty, dep habarlaıdy QazAqparat tilshisi.

Úkimet otyrysynan keıin BAQ ókilderi Saýda jáne ıntegratsııa mınıstrinen ishki naryqqa qajet pııaz kólemi jetkilikti bolsa, syrtqa shyǵarýǵa salynǵan tyıym nege alynbaıtynyn surady.

«Ázirge biz bul máseleni qarastyrmaımyz. Óıtkeni qazirgi derekter jınaǵy kórsetti (Saýda komıtetiniń málimeti- red.) - 68 myń tonna pııaz bar. Bylaısha qalypty deýge bolady. Eger solaı bolsa, naýryz-sáýir aılaryna 40 myń tonna kerek. Bul derekter búgin rastalsa, komıtet ókilderi fermerlermen ishki naryqta usynýǵa daıyn baǵa týraly kelissóz júrgizedi. Sonda ǵana yqtımal kvota engizý máselesin qaraımyz», - dedi Serik Jumanǵarın.