Pııaz artqan eki júk kóligi Reseıge ótip ketpek bolǵan

AQTÓBE. QazAqparat - Pııaz artqan eki aýyr júk kóligi shekaradan ótpek bolǵan, dep habarlaıdy QazAqparat.

31 qańtarda Aqtóbe oblysy boıynsha Memlekettik kirister departamenti pııazdy tasymaldaǵan 2 aýyr júk avtokólik quralynyń shyǵýyna jol bermedi.

»Aqtóbe oblysyndaǵy «Jaısan» avtomobıl ótkizý pýnktinen (Qazaqstan-Reseı shekarasy) Shymkent qalasy men Túrkistan oblysynan pııaz tasymaldaǵan 2 aýyr júk kóligi ótip ketpek bolǵan. Atalǵan avtokólik quraldarynyń júrgizýshilerine pııazdy shekaradan shyǵarýǵa tyıym salynǵany týraly habarlandy.

Qazirgi ýaqytta pııazdy jóneltýshilerge qaıtarý nemese ony Qazaqstannyń basqa oblystarynda satý týraly másele sheshilýde», - dep jazdy departamentten.

Eske sala keteıik, 28 qańtardan bastap 3 aı merzimge Qazaqstan Respýblıkasynyń aýmaǵynan pııazdy áketýge tyıym salynǵan bolatyn.