Pitir sadaqa elimiz boıynsha jan basyna 200 teńge bolyp bekitildi

Bul týraly búgin Qazaqstan musylmandary dinı basqarmasynyń Naıb múftıi, «Nur Astana» ortalyq meshitiniń bas ımamy Naýryzbaı qajy Taǵanuly málim etti.

«Pitir sadaqany Ramazan aıynyń basynan Aıt namazyna deıin berýge bolady. Bıyl pitir sadaqa elimiz boıynsha jan basyna 200 teńge bolyp bekitildi», - dedi ol.

Sonymen qatar ol Astana qalasyndaǵy barlyq meshitter Ramazan aıyna qoldan kelgenshe daıyndalyp jatqandyǵyn basa atap ótti.

«Áziret Sultan» meshiti, «Nur Astana» meshitteri 400-500 adamǵa arnaıy aýyzsharalar ótkizedi. Sonymen qatar, árbir meshit óz deńgeıinde qaıyrymdylyq sharalarymen aınalysýǵa daıyndalyp jatyr. Qaıyrymdylyq sharalary kóbinese qarttar úıine, jetimder úıine, bolmasa, kóp balaly úılerge baǵyttalady. Sonymen qatar, qatty syrqat, biraq emine qarajat jetpegen jandarǵa kómektesý josparda bar», - dedi Naýryzbaı qajy Taǵanuly.