Pyshaq ustaý qandaı jaǵdaıda zań buzýshylyqqa jatady
ASTANA. KAZINFORM – QR Іshki ister mınıstrligi resmı saýalymyzǵa joldaǵan jaýabynda pyshaqty zańdy túrde alyp júrýdiń sharttaryn túsindirdi.
– Sýyq qarýdy (pyshaqtardy) kámeletke tolǵan adamdar azamattyq qarýdy saqtaýǵa jáne alyp júrýge arnalǵan ruqsaty, sondaı-aq, ańshy kýáligi bolǵan jaǵdaıda satyp alady, – delingen habarlamada.
Demek, pyshaqty ustaýǵa ǵana emes, satyp alýǵa da arnaıy ruqsat kerek. Sonymen birge, satyp alynǵan sýyq qarý ıesiniń ańshy kýáligine engizilýi qajet. Odan bólek, pyshaqty mamandandyrylǵan dúkenderde satyp alý shart.
– Mınıstrlik qarýdyń kez kelgen túrin, sondaı-aq qarýǵa konstrýktsııalyq jaǵynan uqsas buıymdardy ótkizý týraly aqparatqa turaqty negizde monıtorıng júrgizedi. Atalǵan aqparat rastalǵan jaǵdaıda, qoldanystaǵy zańnamaǵa sáıkes tıisti den qoıý sharalary qabyldanady. Azamattyq qarýdy ótkizý tek mamandandyrylǵan dúkenderdiń saýda zaldarynda júzege asyrylady, – delingen resmı jaýapta.
Taǵy bir aıta ketetin mańyzdy jaıt – «Jekelegen qarý túrleriniń aınalymyna memlekettik baqylaý jasaý týraly» Zańnyń 7-baby 2-bóligi 9-tarmaǵyna sáıkes, tıisti tirkeýsiz 90 mıllımetrden asatyn suqpa sýyq qarýdyń aınalymyna tyıym salynady.
Demek, turmystyq maqsatta pyshaq ustasańyz, onyń uzyndyǵy 9 santımetrden aspaýy tıis. Poıyzǵa, kólikke ne basqa da qajetti jerlerge pyshaq alyp shyqqanda, osy normany eskergenińiz abzal.
Sonymen qatar, ІІM bıyl 8 aıdyń qorytyndysy boıynsha 6 jedel-profılaktıkalyq is-shara ótkizilgenin málimdedi. Olar qarý qoldaný arqyly jasalatyn quqyq buzýshylyqtardyń aldyn alýǵa, sondaı-aq zańsyz saqtalatyn qarý-jaraq zattaryn anyqtaýǵa baǵyttalǵan.
Aıta keteıik, buǵan deıin Shymkenttegi dendrosaıabaq mańynda jasóspirimdi pyshaqtap ketkenin jazǵanbyz.
Al Talǵarda nan satatyn orynnyń ıesin pyshaqtap óltirdi.
Oralda burynǵy kúıeýin pyshaqtaǵan áıel úsh jylǵa sottaldy.
Sondaı-aq, Túrkistanda áıelin pyshaqtap óltirdi degen kúdikpen er adam qamaýǵa alyndy.
