PISA-2025: Astana men Soltústik Qazaqstan oblysy úsh baǵyt boıynsha úzdik úshtikke endi
ASTANA. KAZINFORM – Astana men Soltústik Qazaqstan oblysy PISA-2025 halyqaralyq zertteýinde jaratylystaný, matematıka jáne oqý saýattylyǵy boıynsha úzdik úsh óńirdiń qataryna endi.
Oqý-aǵartý mınıstri Juldyz Súleımenovanyń tóraǵalyǵymen ótken apparattyq keńeste óńirlik bilim basqarmalary basshylarynyń qatysýymen PISA-2025 halyqaralyq zertteýiniń óńirler boıynsha nátıjeleri qaraldy.
Zertteý qorytyndysyna sáıkes, jaratylystaný saýattylyǵy boıynsha Soltústik Qazaqstan oblysy birinshi orynǵa shyqty. Ekinshi orynda – Astana, úshinshi orynda – Qostanaı oblysy.
Matematıkalyq saýattylyq boıynsha eń joǵary nátıjeni Jambyl oblysy kórsetti. Astana ekinshi, Soltústik Qazaqstan oblysy úshinshi orynǵa turaqtady.
Al oqý saýattylyǵy boıynsha Astana kósh bastady. Qostanaı oblysy ekinshi, Soltústik Qazaqstan oblysy úshinshi orynnan kórindi.
Osylaısha, Astana men Soltústik Qazaqstan oblysy PISA-2025 zertteýiniń barlyq úsh negizgi baǵyty boıynsha da úzdik úshtikke kirip, joǵary ári turaqty nátıje kórsetti.
– PISA nátıjelerin jekelegen óńirlerdiń jetistigin baǵalaý retinde ǵana emes, eń aldymen bilim sapasyn odan ári arttyrýdyń quraly retinde qarastyrý qajet. Turaqty joǵary nátıje kórsetip otyrǵan óńirlerdiń tájirıbesin jan-jaqty zerdelep, tıimdi praktıkalardy aıqyndaý jáne olardy taratý mańyzdy. Sonymen qatar nátıjeleri jumysty kúsheıtýdi qajet etetin óńirlerge erekshe nazar aýdarylýy tıis, – dedi Juldyz Súleımenova.
Keńes qorytyndysy boıynsha mınıstrlik qurylymdyq bólimsheler men vedomstvolyq baǵynysty uıymdardyń basshylaryna PISA-2025 nátıjelerin óńirler bólinisinde egjeı-tegjeıli taldaýdy tapsyrdy.
Sondaı-aq bilim berý nátıjelerindegi óńirlik aıyrmashylyqtardy qysqartý boıynsha tıisti sharalar aıqyndalmaq.
Aıta keteıik, qazaqstandyq oqýshylar PISA-2025 zertteýinde qandaı nátıje kórsetkenin mynaý siltemeden oqı alasyz.
