Pırotehnıkalyq zattardy zańsyz saýdalaýdyń 15 áreketi tirkeldi
ASTANA. Jeltoqsannyń 29-y. QazAqparat /Aıdar Ospanalıev/ - Elimizdiń lıtsenzııalaý men ruqsat berý organdarynyń qyzmetkerleri tótenshe jaǵdaılar mınıstrliginiń ókilderimen birlese otyryp, pırotehnıkalyq zattardy zańsyz saýdalaýdyń aldyn alý maqsatynda arnaıy saýyqtyrý sharalaryn júrgizýde.
Osy sharalar barysynda pırotehnıkalyq zattardy zańsyz saýdalaýdyń 15 áreketi tirkeldi. Atalmysh áreketter boıynsha ákimshilik is qozǵalyp materıaldar sotqa joldandy, dep habarlaıdy QazAqparat.
Astana qalalyq Іshki ister departamentiniń Qoǵamdyq qaýipsizdik basqarmasynyń bastyǵy Batyrlan Esenbaıdyń málimetterinshe, quzyrly organdar oıyn-saýyq oryndarynyń barlyǵynyń basshylarymen órt qaýipsizdigin saqtaý men pırotehnıkalyq zattardy paıdalanýǵa jol bermeý jóninde arnaıy túsindirý jumystaryn júrgizgen. Búginde Astanada 5 zańdy tulǵa pırotehnıkalyq zattardy saýdalaýǵa quqyly. Olar «Astana salıýt», «STIK», «Belaıa noch agenttigi», «Rýskıı feıerverk birlestigi KZ», «Qazaqstan salıýt» jaýapkershiligi shekteýli seriktestikteri. «Qazirgi tańda mektepke deıingi jáne oqý oryndary men oıyn-saýyq mekemelerinde órtke qarsy qaýipsizdik máselesine baılanysty arnaıy tekserý jumystary júrgizildi. Barlyǵy 64 orta mektep, 27 kolledj, 5 kásiptik mektepter men 38 mektepke deıingi mekemeler, 410 oıyn-saýyq oryndary tekserildi», dedi basqarma bastyǵy.
