Pırotehnıkalyq ónimderden jaraqat alǵan kezde ne isteý kerek
Spıkerdiń sózinshe, feırverkter men otshashýlar – jańa jyldyq merekelerdiń aınymas atrıbýty. Kez kelgen pırotehnıkalyq ónimnen órt shyǵý nemese jaraqat alý qaýpi bar.
Travmatolog eger jazataıym oqıǵa oryn alǵan bolsa, dáriger kelgenge deıin eń aldymen ne isteý kerektigin egjeı-tegjeıli túsindirdi. Sondaı-aq ol pırotehnıkalyq zattardyń jarylýy nátıjesinde kózdiń shyryshty qabatyna bógde bólshekter túskende ne isteý kerektigi jóninde birqatar usynys aıtty.
«Eger oqys oqıǵa úıde oryn alsa, onda tez arada kózdiń shyryshty qabatyn bólme temperatýrasynda kóp mólsherde qaınaǵan sýmen shaıyp, tańǵysh qoıý kerek. Al eger apat kóshede oryn alsa, onda qol oramaly, moıyn oraǵysh sııaqty zattardan kózge tańǵysh qoıý jetkilikti. Al eger bul zattardyń bireýi de bolmasa, kózdi bas kıimmen nemese qolmen jabýǵa bolady. Ári qaraı tez arada medıtsınalyq kómekke júginý kerek», - dep túsindirdi dáriger.
Sonymen birge ol terige jarylys bólshekteri túsip, termııalyq kúıik shalǵanda jáne teri zaqymdanǵan jaraqattar kezinde ne isteý kerektigin aıtty.
«Terige jarylys bólshekteriniń túsýimen termııalyq kúıik bolǵan jaǵdaıda terini aǵyp turǵan sýmen kóp shaıý jáne qurǵaq aseptıkalyq tańǵyshty qoldaný usynylady. Eger apat kóshede oryn alsa, onda taza matanyń bir bóliginen tańǵysh qoıyp qoıý kerek. Terini araqpen, odekolonmen súrtýge bolmaıdy», - dedi ortoped-travmatolog.
Sondaı-aq, spıker qan ketýmen qatar júretin ashyq jaralar bolsa, qysymdy tańǵysh taǵyp, dereý jedel járdem shaqyrý kerektigin eske saldy.
Aıta keteıik, Almatyda travmatologııalyq pýnktter kópsalaly statsıonarlarda táýlik boıy jumys isteıdi.
Ashyq kózderden alynǵan foto
