Pırotehnıkany zańsyz satqandarǵa qandaı shara qoldanylady
Elimizdiń aýmaǵynda «Pırotehnıka» jedel aldyn alý is-sharasy bastaldy. Bul týraly ІІM Ákimshilik polıtsııa komıtetiniń basqarma bastyǵy Asylbek Ydyrysov aıtty, dep habarlaıdy Kazinform.
«Іshki ister mınıstrligi osy jylǵy 25 jeltoqsannan bastap 2024 jylǵy 3 qańtar aralyǵynda Tótenshe jaǵdaılar mınıstrliginiń azamattyq qorǵaý bólimshelerimen birlesip, «Pırotehnıka» jedel aldyn alý is-sharasyn ótkizedi. Atalǵan is-shara naryqtarda sertıfıkattalmaǵan pırotehnıkalyq buıymdardy, sondaı-aq olardy ruqsatsyz beı-bereket satý faktilerin anyqtaýǵa jáne jolyn kesýge baǵyttalǵan. Іs-sharalar barysynda pırotehnıkalyq buıymdardy saqtaý, esepke alý, paıdalaný, tasymaldaý tártibiniń saqtalý mánine zańdy tulǵalar jáne saýda oryndaryn tekseretin bolady», - dedi ol mınıstrliktiń baspasóz qyzmeti alańynda ótken brıfıngte.
Onyń atap ótýinshe, kámeletke tolmaǵandarmen pırotehnıkalyq buıymdardy paıdalaný kezinde jaraqat alýdyń profılaktıkasyna erekshe kóńil bólinedi. Bul rette, mektepterde oqýshylarmen tıisti túsindirý jumystary júrgiziledi. Pırotehnıka – bul órttiń shyǵýyna ǵana emes, adam densaýlyǵyna aıtarlyqtaı zııan keltiretin qaýipti qural. Ony durys paıdalanbasa jazataıym jaǵdaıǵa ákelýi múmkin.
«Qaýipsizdik maqsatynda pırotehnıkalyq buıymdardy satý qyzmeti túrine tıisti lıtsenzııalary bar mamandandyrylǵan dúkender men saýda oryndarynan ǵana satyp alǵan durys. Pırotehnıkany satyp alý kezinde eń aldymen satýshydan ónimge sáıkestik sertıfıkatyn talap etý qajet. Árbir pırotehnıkalyq buıym úshin memlekettik jáne orys tilderinde ony qoldaný jónindegi nusqaýlyq bolýy kerek. Buıymnyń syrtqy qaptamasynyń durystyǵyna jáne saqtaý merzimine mindetti túrde nazar aýdarǵan jón», - dedi Asylbek Ydyrysov.
Mınıstrlik ókiliniń aıtýynsha, elimizde pırotehnıkalyq buıymdardy óndirý, satý qyzmeti letsenzııalaýǵa jatady. Búgúngi kúni osy qyzmet túrimen aınalysatyn 40 astam zańdy tulǵa tirkeýde tur. Al pırotehnıkalyq buıymdardy zańsyz (ruqsat qujattarsyz) satqany, ótkizgeni, tasymaldaǵany úshin Ákimshilik quqyq buzýshylyq týraly kodeks baptarymen jaýapkershilik kózdelgen.
Atap aıtqanda, erkin saýda jasaýǵa Qazaqstan zańnamasymen tyıym salynǵan nemese shektelgen taýarlarmen jáne ózge de zattarmen saýda jasaǵany úshin 86 myń 250 teńge, jeke tulǵalardyń tynyshtyǵyn pırotehnıkany qoldana otyryp buzǵany úshin 69 myń teńge mólsherinde aıyppul salynady.
