Pırotehnıka tańdaǵan kezde nege mán berý kerek – qutqarýshylar keńesi

Shyǵys Qazaqstan oblysynyń qutqarýshylary Jańa jyl merekesinde otshashý qoldanǵan kezde qandaı qaýipsizdik talaptaryn saqtaý kerektigin túsindirdi, dep habarlaıdy Kazinform.

ShQO Tótenshe jaǵdaılar departamenti baspasóz qyzmetiniń málimetinshe, Jańa jyl merekesi jaqyndaǵan saıyn qutqarýshylar kúsheıtilgen jumys rejımine kóshedi. Óıtkeni osy kúnderi úıler men páterlerde órt kóbeıý qaýpi bar. 

«Otshashýlardy paıdalanǵan kezde barynsha abaı bolý qajet. Pırotehnıkanyń kóbinde sekýndyna 3-5 mıllımetr jyldamdyqpen janatyn uzyn ári jińishke fıtıl bar. Qaýipti aımaqtyń radıýsy 60 metrge deıin jetýi múmkin», - deıdi TJD memlekettik órt baqylaý basqarmasynyń bastyǵy Nurjan Ómirjanov.

Pırotehnıkany satyp alǵanda jaramdylyq merzimi men qaptamanyń kúıine mán berińiz. Tek osy ónimdi satýǵa lıtsenzııasy bar mamandandyrylǵan dúkenderden satyp alǵan jón. Otshashýdy úıde uzaq ýaqyt saqtaýǵa tyıym salynady. Bul talapty buzý jazataıym oqıǵalarǵa nemese órtke ákelip soqtyrýy múmkin. 

«Pıratehnıka qaptamasy bútin, jyrtylmaǵan bolýy tıis. Ony jaqqan kezde temeki shegýge múlde bolmaıdy. Kólikterdiń janynda da otshashýdy atýǵa ruqsat etilmegen. 50 metr radıýsta órt qaýpi bar obektiler bolmaýy qajet», - deıdi N.Ómirjanov.