«Pırotehnıka-2011» jedel aldyn alý is-sharasy barysynda aınalymnan 3 tonnadan asa zańsyz pırotehnıkalyq ónim alyndy - ІІM
ASTANA. 4 qańtar. QazAqparat - «Pırotehnıka-2011» jedel aldyn alý is-sharasy barysynda aınalymnan 3 tonnadan asa zańsyz pırotehnıkalyq ónim alyndy, dep habarlady QR Іshki ister mınıstrliginiń baspasóz qyzmetinen.
Vedomstvonyń habarlaýynsha, qoǵamdyq tártipti qamtamasyz etý, pırotehnıkalyq buıymdardy saqtaý, tasymaldaý, ákelý retin tekserý, sondaı-aq, sertıfıkattalmaǵan ónimderdi jetkizetinderdi anyqtaý maqsatynda Іshki ister mınıstrligi memlekettik órtke qarsy qyzmeti, óndiris qaýipsizdigi, tehnıkalyq qadaǵalaý jáne kedendik baqylaý organdary qyzmetterimen birlesip, 19-31 jeltoqsan aralyǵynda «Pırotehnıka-2011» jedel aldyn alý is-sharasyn ótkizdi.
Atalǵan merzim ishinde respýblıka boıynsha 3203 bazarlar men dúkender, basqa da saýda oryndary tekserildi. Pırotehnıkalyq ónimdi satý erejesin buzǵany úshin 118 ákimshilik hattama, zańsyz satqany (lıtsenzııasyz jeke kásipkerlikpen aınalysqany) úshin 18 hattama toltyryldy.
«Aınalymnan úsh tonnadan asa (20 myńnan asa qorap) zańsyz pırotehnıkalyq ónim, 187 feıerverlik konteıner alyndy. Atap aıtqanda, 22 jeltoqsanda Astana qalasy ІІD-niń qyzmetkerleri «Luqman» saýda úıiniń qasynda 26 jastaǵy jeke kásipkerden 4 qorap jáne 213 dana sertıfıkattalmaǵan pırotehnıkalyq ónimdi anyqtap, ákimshilik hattama toltyrdy», - delingen mınıstrlik aqparatynda.
Sonymen qatar Taldyqorǵan qalasynda pırotehnıkalyq ónimdi tasymaldaýdyń erejesin buzǵany úshin 21 jastaǵy jergilikti turǵyn ustaldy. Avtokóligin tekserý kezinde 15 keli pırotehnıkalyq ónim tabylyp, ákimshilik hattama toltyryldy.
