Pirmatov teńgeni nyǵaıtqan birneshe faktordy atady

ASTANA. QazAqparat – Osy jyldyń basynan teńgeniń dollarǵa qatysty baǵamy 3,1 paıyzǵa nyǵaıdy. Bul týraly Úkimet otyrysynda Ulttyq bank tóraǵasy Ǵalymjan Pirmatov aıtty, dep habarlaıdy QazAqparat tilshisi.

«Jyl basynan bastap mamyr aıynyń sońyna deıin teńgeniń dollarǵa qatysty baǵamy 1 dollar úshin 448,16 teńgege deıin 3,1 paıyzǵa nyǵaıdy. Ulttyq bank valıýtalyq ınterventsııalar júrgizgen joq. Jyl basynan ulttyq valıýtanyń nyǵaıýy birneshe faktormen baılanysty boldy. Birinshiden, el ishinde de, beırezıdentter tarapynan da teńgedegi quraldardyń tartymdylyǵy saqtalyp otyr. Bıyl jyl basynan bastap depozıtterdi dollarlandyrý deńgeıi 2022 jylǵy jeltoqsandaǵy 31,6 paıyzdan osy jyldyń sáýir aıynyń qorytyndysy boıynsha 29,3 paıyzǵa deıin tómendedi. Qazaqstan Respýblıkasynyń memlekettik baǵaly qaǵazdaryna ınvestıtsııalaǵan sheteldik ınvestorlardyń aǵyny 94 mlrd teńgege ulǵaıdy», - dedi Ǵalymjan Pirmatov.

Onyń aıtýynsha, ekinshiden, qańtar-mamyr aılarynda Ulttyq qordan respýblıkalyq bıýdjetke transfertterdi qamtamasyz etý úshin 2,9 mlrd dollar mólsherinde valıýtany satýy jáne kvazımemlekettik sektor sýbektileriniń 1,6 mlrd dollar somasyna valıýtalyq túsimdi satýy teńgege qoldaý kórsetti. Teńge dınamıkasy naryqqa qatysýshylardyń kútýlerine, álemdik naryqtardaǵy ahýalǵa jáne geosaıası jaǵdaıdyń ózgerýine baılanysty bolady.

«Ulttyq bank dısbalanstardyń jınaqtalýyn boldyrmaıtyn jáne altyn-valıýta rezervteriniń saqtalýyn qamtamasyz etetin ıkemdi baǵam belgileý rejımin ustanýdy jalǵastyrady», - dedi ol.