Pirmatov rýbl aınalymy týraly: Qajet bolsa UB pen Úkimet sheshim qabyldaıdy

ASTANA. QazAqparat –Ulttyq banktiń basqarma tóraǵasy Ǵalymjan Pirmatov el aýmaǵyndaǵy Reseı rýbliniń aınalymy týraly málimet berdi, dep habarlaıdy QazAqparat tilshisi.

Ulttyq bank ótkizgen brıfıngte BAQ ókilderi Reseı rýbliniń Qazaqstan aýmaǵyndaǵy aınalymyn retteý úshin shekteý qoıý múmkin be degen saýal qoıdy.

Ulttyq bank basshysy qazir jaǵdaı baqylaýda ekenin, qajet bolsa Úkimetpen birlesip qajetti sheshim qabyldaýǵa bolatynyn aıtty.

«Buǵan deıin Prezıdenttiń Jarlyǵymen bizdiń eldiń aýmaǵynan shetel valıýtasymen aqsha shyǵarýǵa shekteý qoıylǵan. Ol Jarlyqtyń maqsaty – qarjy júıesiniń turaqtylyǵyn qamtamasyz etý jáne sanktsııa táýekelderin azaıtý. Sáýirden bastap shildege deıin biz ekinshi deńgeıli bankterdiń kassalarynda qolma-qol rýbldiń jınaqtalǵanyn baıqaǵan edik. Shilde-tamyzda biz jınaqtalǵan qolma-qol aqshanyń bárin syrtqa shyǵarýǵa múmkindik berdik. Esterińizde bolsa, ol 38,3 mlrd rýbl bolatyn», - degen Ulttyq bank basshysy qazir bank kassalarynda ol kezdegideı kóp rýbl joq ekenin málim etti.

«Búginde, bizdiń sońǵy málimetter boıynsha, ekinshi deńgeıli bankterdiń kassasyndaǵy rýbl massasy shetin mólsherde emes. Biz ony kúndelikti baqylap otyrmyz. Qajet bolǵan jaǵdaıda Ulttyq bank pen Úkimet qajetti sheshim qabyldaıdy», - dedi Ǵalymjan Pirmatov.