Pirmatov: Inflıatsııa turaqty tómendep keledi dep aıtýǵa áli erte
«Elimizdiń ınflıatsııalyq protsesterindegi biz kútken keıbir oń trendterge qaramastan, ınflıatsııa turaqty tómendep keledi dep aıtýǵa áli erte. Táýekelder balansy proınflıatsııalyq jaqqa yǵysqan kúıin saqtap otyr. Buǵan joǵary jáne qysqa merzimdi baǵa shoktaryna sezimtal ınflıatsııalyq kútýler yqpal etedi. Sonymen qatar retteletin taýarlar men qyzmetterge baǵanyń ósýi nátıjesinde ınflıatsııanyń jedeldeý táýekeli iske asyryla bastady. Memlekettik bıýdjet shyǵystaryn eleýli túrde qaıta qaraý jáne bıýdjettik qaǵıdany paıdalanýdy ýaqytsha toqtata turý qosymsha proınflıatsııalyq qysym týdyrýda.
Joǵaryda kórsetilgen táýekelderdi, ınflıatsııanyń dınamıkasyn jáne onyń boljamdarǵa sáıkestigin eskere otyryp, Aqsha-kredıt saıasaty komıteti birinshi jartyjyldyqta bazalyq mólsherlemeni qazirgi deńgeıde ustaý qajettigi týraly buǵan deıin de aıtylǵan pozıtsııasyn ustanady», - dedi ol.
Onyń atap ótýinshe, bul bastalǵan ınflıatsııalyq protsesterdiń birshama baıaýlaýyn qoldaýǵa, bıýdjet shyǵystarynyń ósýinen bolatyn ınflıatsııalyq qysymdy azaıtýǵa jáne ınflıatsııalyq kútýlerdiń joǵary deńgeıde turaqtanýynyń aldyn alýǵa múmkindik beredi.
«Bazalyq mólsherleme boıynsha budan keıingi sheshim jańa derekterdiń, sonyń ishinde bizdiń 2023 jylǵy mamyr aıynda boljamdy jańartý kezindegi eskeretin reforma parametrleriniń shyǵýyna táýeldi bolady. Biz janar-jaǵarmaı baǵasynyń ósýinen bolatyn ınflıatsııaǵa tikeleı áserge qatysty is-shara qoldanýdy josparlamaımyz. Sonymen qatar, monetarlyq saıasat boıynsha sheshim qabyldaý kezinde biz qosymsha áserlerdi, sonyń ishinde baılanysty taýarlar baǵasynyń ózgerýin, ınflıatsııalyq kútýlerdi muqııat qadaǵalap, taldaıtyn bolamyz. Aıtylǵan ınflıatsııalyq táýekelderdi eskere otyryp, Ulttyq bank aǵymdaǵy aqsha-kredıt jaǵdaılaryn saqtaýdy jalǵastyrady», - dedi UB tóraǵasy.
