Pirmatov «7-20-25» týraly: Baǵdarlama únemi jalǵasatynyn eshkim aıtqan joq

ASTANA. QazAqparat – «7-20-25» baǵdarlamasy daǵdarysqa qarsy ári ýaqytyly júzege asyryldy. Bul týraly Ulttyq bank tóraǵasy Ǵalymjan Pirmatov aıtty, dep habarlaıdy QazAqparat tilshisi.

«Ulttyq bank toqsan saıyn 25 mlrd, jylyna 100 mlrd teńge delingen aqparatty qadaǵalaıtyn bolady. Qazirgi ýaqytta bul parametrlerdi ózgertýge qatysty eshqandaı jospar joq», - dedi ol Ulttyq bankte ótken brıfıng barysynda BAQ ókilderiniń «7-20-25» baǵdarlamasyna qatysty qoıylǵan saýalyna oraı.

Sonymen qatar ol arzan ári naryqqa saı kelmeıtin nesıe usyný Ulttyq banktiń mindeti emestigin basa aıtty.

«Іs-shara daǵdarysqa qarsy jasaldy. Ulttyq bank bul baǵdarlamaǵa qatysty. Olardyń barlyǵy daǵdarysqa qarsy ári ýaqytyly edi. Bul is-sharalardan biz qalaı tezirek shyqsaq, barlyq qazaqstandyqtar úshin uzaqmerzimdi tıimdirek bolady», - dedi UB tóraǵasy.

Ǵalymjan Pirmatov baǵdarlamanyń ýaqytsha bolǵandyǵyn aıtady.

«Esterińizde bolsa, 2018 jyly ol jarııa etilgen kezde 1 trln teńge bólinetindigi aıtyldy jáne bul qarajat osy jyldyń birinshi jartyjyldyǵynda taýsylýy tıis. Demek, is júzinde biz barlyq mindettemeni oryndaımyz. Ýáde berip, artynan qysqartyp tastaý degen joq. Bul baǵdarlamany únemi bolatyndyǵyn ári qarjyǵa qatysty eshqandaı shekteý joqtyǵyn eshkim aıtqan joq», - dedi Ǵalymjan Pirmatov.