Pirimqulov ekologııalyq tólemnen túsetin qarjy qalaı jumsalýy keregin túsindirdi
NUR-SULTAN. QazAqparat – Ekologııa, geologııa jáne tabıǵı resýrstar vıtse-mınıstri Ahmetjan Pirimqulov ekologııalyq tólemderden túsetin qarajat qandaı maqsatqa jumsalýy kerektigin túsindirdi, dep habarlaıdy QazAqparat tilshisi.
«Mańyzdy máseleniń taǵy bir tarmaǵy – ekologııaǵa bıýdjet qarajatyn shyǵyndaý máselesi. Halyq pen bıznes ókilderi «kásiporyndardyń emıssııa úshin jergilikti bıýdjetke tólep jatqan qarajaty qaıda ketip jatyr, óńirde ekologııalyq aýhaldy jaqsartý úshin ne jasalady?» degen máseleni jıi kóteredi. Statıstıka kórsetip otyrǵandaı, aımaqtar ekologııalyq tólemnen jınalǵan qarajattyń ortasha eseppen 40 paıyzyn ǵana ekologııaǵa jumsaıdy. Keıbir óńirde bul kórsetkish tipti 5 paıyzǵa da jetpeıdi. Sol sebepti biz bul qarajattyń bári de ekologııaǵa, qorshaǵan ortany qorǵaýǵa jumsalýy kerektigi týraly normany (Ekologııalyq kodeks jobasyna) engizdik», - dedi Ahmetjan Pirimqulov OKQ-da onlaın rejımde ótken baspasóz máslıhatynda.
Vıtse-mınıstr naqtyraq aıtqanda ekologııalyq tólemderden jınalǵan aqsha kógaldandyrýǵa, saıabaqtar men kárizdik tazalaý qurylymdarynyń qurylysyna, turmystyq qaldyqtar polıgonyn qalpyna keltirýge jumsalýy kerektigin jetkizdi.
«2025 jyldan bastap jańa tehnologııalardy óndiriske engizbegen kásiporyndarǵa emıssııa úshin salynatyn salyq artady. Osy salyq ta aınalyp kelgende ekologııalyq shyǵyndar úshin jumsalýy tıis. Óz óndirisin jaqsartqysy kelmegender – kóbirek aqsha tóleýi tıis. Al jergilikti atqarýshy organdar bul qarajatty ekologııalyq ahýaldy jaqsartýǵa jumsaýy tıis», - dedi ol.
Vıtse-mınıstr sonymen qatar aýa zııandy zattardy shyǵaratyn oryndarǵa monıtorıng pen baqylaý júrgizýdiń avtomattandyrylǵan júıesin engizý normasy mindetti bolýy kerektigin aıtyp ótti.
«Qoǵam kásiporyndardyń shyǵaryndylary týraly málimetti ashyq bilýi kerek dep esepteımiz. Jalpy elde ekologııalyq belsendilik artyp keledi», - dedi ol.
