«Pınokkıo» hıkaıasyn qazaq tiline aýdarý mańyzdy boldy – ıtalııalyq jazýshy
ASTANA. KAZINFORM — Astanada Karlo Kollodıdiń «Pınokkıonyń basynan keshken oqıǵalary» shyǵarmasy tuńǵysh ret ıtalıan tilindegi túpnusqadan qazaq tiline tolyq aýdarylyp, jeke kitap bolyp jaryq kórdi. Jazýshynyń týǵanyna 200 jyl tolýyna oraı oqyrmanǵa jol tartqan týyndynyń taǵylymy men qazaq jáne ıtalıan ádebıetindegi orny týraly tarıhshy, jazýshy ári jýrnalıst Djordano Brýno Gerrı «Búgin Live» baǵdarlamasynda Kazinform tilshisine aıtyp berdi.
Jazýshynyń pikirinshe, «Pınokkıonyń basynan keshken oqıǵalary» shyǵarmasynyń qazaqsha jaryq kórýi onyń tól mazmunyn keńinen tanytýǵa jol ashqan. Ol buǵan deıin kitap orys tilinde jaryq kórgenin, biraq bul nusqanyń túpnusqadan erekshelenetinin atap ótti.
— Bul shyǵarmany qazaq tiline aýdarý asa mańyzdy boldy. Óıtkeni buǵan deıin jaryq kórgen oryssha nusqada oqıǵa jelisi birshama ózgertilgen, al túpnusqadaǵy baıandaý ózgeshe. Pınokkıo týraly hıkaıa ıtalıan tiliniń ásem órnegimen jazylǵanymen, tili qarapaıym ári túsinikti. Sondyqtan ony aýdarý kezinde aıtarlyqtaı qıyndyq bolǵan joq, – dedi ol.
Djordano Brýno Gerrı kópshilikke bala kezden tanys bul ertegi álemniń 207 tiline aýdarylǵanyn, endi olardyń qataryn qazaq tili de tolyqtyrǵanyn aıtty. Onyń sózinshe, mundaı aýdarma úlken kásibı sheberlik pen erekshe jaýapkershilikti talap etedi.
– Bul shyǵarmany sapaly aýdarý úshin aýdarmashynyń kásibı sheberligi men mol tájirıbesi bolýy shart, – dedi ol.
Sonymen birge Qazaqstandaǵy Italııa elshiliginiń mádenı attashesi Edoardo Krızafýllı kitapty aýdarý kezinde bilikti maman tańdaýmen qatar, onyń búkil jumys barysyna qoldaý kórsetýdiń de mańyzy zor bolǵanyn atap ótti. Onyń aıtýynsha, aýdarmashy jáne ıllıýstratormen udaıy pikir almasý shyǵarmanyń mazmuny men ózindik atmosferasyn qazaq tilinde dál jetkizýge múmkindik bergen.
Qazaqstan men Italııa arasyndaǵy mádenı baılanystarǵa toqtalǵan Edoardo Krızafýllı mundaı jobalar eki eldiń dostyq qarym-qatynasyn nyǵaıtýǵa zor úles qosatynyn aıtty.
– Mádenıet salasyndaǵy ortaq bastamalar eki eldiń arasyndaǵy qalyptasqan berik baılanysty odan ári nyǵaıtady. Uly Dante aıtqandaı, mádenıet – perishtelerdiń azyǵy. Biz kıno ónerinen bastap, túrli baǵytta birlesken jobalardy júzege asyryp, mádenı baılanystardy jáne zamanaýı ónerdi damytýǵa kúsh salyp kelemiz, – dedi ol.
Sondaı-aq ol keler jyly Djordano Brýno Gerrıdiń qatysýymen kórme ótetinin habarlady.
Pınokkıo – balalar ertegisinen de tereń shyǵarma
Pınokkıonyń oqıǵasy jas oqyrmanǵa qandaı taǵylym bere alatyny jóninde oı bólisken jazýshy bul týyndynyń óz ómirinde aıryqsha orny baryn jetkizdi. Bala kúninde oǵan kitapty anasy oqyp berip, erekshe mán bergen tustaryn qaryndashpen belgilep otyrǵan.
– Anamnyń maǵan oqyp bergen kitaby áli kúnge deıin saqtaýly. Shyǵarmadaǵy meniń esimde erekshe qalǵany – Pınokkıonyń ákesimen qarym-qatynasy. Ákesi ulynyń tentektigine alǵashynda qınalǵanymen, oǵan degen súıispenshiliginen aınymaıdy. Aqyr sońynda dál osy sheksiz mahabbat Pınokkıony naǵyz balaǵa aınaldyrady, – dedi Djordano Brýno Gerrı.
Áńgime barysynda spıkerler ıtalıan jáne qazaq mádenıetteriniń ózara uqsastyqtaryna da toqtaldy. Atap aıtqanda, eki halyq ta otbasyn, anany erekshe qadirleıdi, saıahattaǵandy jáne qamyrdan daıyndalatyn dástúrli taǵamdardy unatady. Suhbattasýshylardyń pikirinshe, osyndaı kúndelikti ómirdegi ortaq qundylyqtar ártúrli mádenıet ókilderiniń bir-birin jaqynyraq tanyp, til tabysýyna jol ashady.
Italııalyq jazýshynyń áıgili shyǵarmasy qazaqshaǵa aýdarylǵanyn jazǵan edik.
Buǵan deıin ádebıet pen kitap oqýdyń tsıfrlyq tehnologııalary salasyndaǵy 10 qazaqstandyq jobaǵa 50 mln teńge grant bólinetini habarlanǵan bolatyn.
