Pinduoduo men Claude salyq tekserisinen keıin Qazaqstan bıýdjetine 8 mlrd teńge tóledi
ASTANA. KAZINFORM — Qytaıdyń Pinduoduo marketpleısi men Claude jasandy ıntellekt kómekshisin ázirleýshi Anthropic kompanııasy salyqtyq ákimshilendirý jáne kameraldyq baqylaý qorytyndysy boıynsha Qazaqstan bıýdjetine jalpy 8 mlrd teńge aýdardy. Bul týraly QR Qarjy mınıstrliginiń Memlekettik kirister komıteti habarlady.
Memlekettik kirister komıteti Qazaqstan aýmaǵynda jumys isteıtin sheteldik ınternet-platformalardyń salyq tóleýin qamtamasyz etý baǵytyndaǵy jumysty jalǵastyryp jatqanyn málimdedi.
Salyqtyq ákimshilendirý nátıjesinde Pinduoduo bıýdjetke 6,8 mlrd teńge (15,1 mln dollar) aýdardy.
Budan bólek, Claude jasandy ıntellekt kómekshisin ázirleýshi Anthropic, PBC kompanııasy ótken salyq kezeńderi úshin 1,2 mlrd teńge (shamamen 2,6 mln dollar) tóledi. Kompanııa kameraldyq baqylaý nátıjesinde joldanǵan habarlamalardaǵy talaptardy oryndady.
— Zańnamada sheteldik ınternet-platformalar salyq zańnamasynyń talaptaryn oryndamaǵan jaǵdaıda olardyń ınternet-resýrstaryna qoljetimdilikti shekteý múmkindigi qarastyrylǵan. Osyǵan baılanysty komıtet Ulybrıtanııada tirkelgen Farfetch platformasynyń operatoryna kameraldyq baqylaý týraly habarlama joldady. Habarlama oryndalmaǵandyqtan, Qazaqstan aýmaǵynda Farfetch ınternet-resýrsyna qoljetimdilik shekteldi, — dep habarlady QR Qarjy mınıstrliginiń Memlekettik kirister komıteti.
Farfetch — tanymal brendterdiń taýarlaryn qosa alǵanda, kıim, aıaqkıim jáne aksessýarlar satylatyn halyqaralyq onlaın-platforma.
Komıtettiń málimetinshe, mundaı sharalar zańnamada belgilengen tártippen tıisti talaptarǵa jatatyn jáne Qazaqstan bıýdjeti aldyndaǵy salyq mindettemelerin oryndamaıtyn barlyq sheteldik ınternet-platformalarǵa qoldanylady.
Eske salaıyq, buǵan deıin Pinduoduo-ǵa shamamen 7 mln teńge aıyppul salynǵanyn jazǵanbyz.
