Pinduoduo-ǵa shamamen 7 mln teńge aıyppul salyndy
ASTANA. KAZINFORM — Qytaıdyń iri elektrondy saýda platformalarynyń biri — Pinduoduo salyqtyq aqparatty belgilengen tártippen usynbaǵany úshin 100 myń ıýan (shamamen 7,3 mln teńge) kóleminde aıyppul tóleýge mindetteldi, dep habarlady Lianhe Zaobao basylymy.
Sınhýa aqparattyq agenttiginiń 21 qańtardaǵy habarlaýynsha, Pinduoduo platformasynyń operatory — Shanghai Xunmeng Information Technology Co., Ltd. kompanııasy «Internet-platforma kásiporyndarynyń salyqtyq aqparatty usyný qaǵıdalaryn» saqtamaǵany úshin Shanhaı qalasynyń Channın aýdany boıynsha Qytaı Memlekettik salyq basqarmasy tarapynan anyqtalǵan.
Salyq organdary kompanııaǵa anyqtalǵan zańbuzýshylyqtardy joıý týraly nusqama bergen. Alaıda kompanııa túzetý jumystaryn bastaǵanymen, olardy belgilengen merzimde tolyq aıaqtamaǵan. Osyǵan baılanysty salyq organy qoldanystaǵy zańnamaǵa sáıkes 100 myń ıýan (shamamen 7,3 mln teńge) kóleminde aıyppul salý týraly sheshim qabyldady.
Buǵan deıin Bloomberg agenttigi derekkózderge silteme jasap, Pinduoduo-ǵa qatysty baqylaý sharalarynyń keńeıtilgenin habarlaǵan bolatyn. Málimetke sáıkes, ótken jyldyń jeltoqsan aıynda kompanııa qyzmetkerleri men baqylaýshy organdar ókilderi arasynda janjal oryn alǵannan keıin, retteýshi qurylymdar tekserý aıasyn ulǵaıtqan.
Derekkózderdiń aıtýynsha, Qytaıdyń Memlekettik naryqty qadaǵalaý basqarmasy men Qytaıdyń Memlekettik salyq basqarmasy ókilderinen quralǵan arnaıy tekserý toby sońǵy aptalarda kompanııanyń Shanhaıdaǵy shtab-páterinde aýqymdy tekserý júrgizgen. Tekserý barysynda júzden astam maman tartylǵan.
Oqıǵalardyń áserinen Pinduoduo kompanııasynyń aktsııalary 8 qańtardan beri 12 paıyzdan astam tómendedi. Sarapshylardyń pikirinshe, retteýshi baqylaýdyń kúsheıýi kompanııanyń operatsııalyq qyzmetine yqpal etip, ınvestorlardyń senimine keri áser etýi múmkin.
Buǵan deıin Qytaı úkimeti 2026–2027 oqý jylyna qazaqstandyq talapkerlerge bakalavrıat, magıstratýra jáne doktorantýra deńgeıleri boıynsha 73 memlekettik bilim grantyn usynatynyn habarlaǵan edik.