Pin-Up-pen sybaılas Dmıtrıı Pýnın men Marına Ilınaǵa izdeý salyndy

ASTANA. KAZINFORM — Qazaqstannyń Qarjylyq monıtorıngi agenttigi halyqaralyq oıyn brendi Pin-Up-pen baılanysy bar degen Dmıtrıı Pýnın men Marına Ilınaǵa izdeý saldy.

Pin-Up-pen sybaılas Dmıtrıı Pýnın men Marına Ilınaǵa izdeý salyndy
Foto: Kazinform/JI

Habarlama Quqyqtyq statıstıka jáne arnaıy esepke alý organdarynyń portalynda jarııalandy.

Aqparatqa sáıkes, tıisti izdeý isteri 2026 jyldyń 30 qazanynda tirkelgen. Іzdeýdi Qazaqstan Respýblıkasy Qarjylyq monıtorıngi agenttiginiń Astana ekonomıkalyq tergeý departamenti júrgizip otyr.

Qazaqstanda «Pin-Up» jáne «Pinco» brendterimen jumys isteıtin onlaın kazınolardyń qyzmetine qatysty tergeýler uzaq ýaqyt boıy júrgizilip keledi.

Aqpan aıynda Qarjylyq monıtorıngi agenttigi Dmıtry Drýjınsky men Marına Levkovıchke (Gınzbýrg) izdeý salǵan.

Agenttik olardyń Qazaqstanda zańsyz oıyn bıznesin uıymdastyrdy degen kúdikke ilingenin habarlady. Tergeý nátıjesinde «PIN-UP» jáne «PINCO» brendterimen onlaın kazınolardy shetelden úlestes kompanııalar jelisi arqyly jumys isteıtin jeke tulǵalar toby uıymdastyrǵany anyqtaldy.

D. Drýjınsky men M. Levkovıch úılestirýshi bolǵan, atap aıtqanda sybaılastardy tartyp, tólem uıymdary men ekinshi deńgeıli bankterdiń ókilderimen árekettes bolǵan, qarajatty qabyldaý men alýdy jeńildetetin tólem ınfraqurylymyn qurǵan.

Sot olardy syrttaı qamaýǵa alý týraly sheshim shyǵardy.