Pılottyq joba Jambyl oblysyndaǵy aýyl turǵyndarynyń turmysyn jaqsartýda

Baızaq aýdanyndaǵy Túımekent aýyly – turǵyndardyń turmystyq tabysyn arttyrýdyń ilki jobasy júzege asqan 11 aýyldyq okrýgtiń biri. Onyń jemisti júrgizilgenin birneshe kórsetkishterden baıqaýǵa bolady desek, sonyń biri – ataýly áleýmettik kómek alýshylar sanynyń 243 adamǵa azaıǵany. Bul týraly halyq jáne óńir basshysy Berdibek Saparbaevtyń aldynda bergen esebinde aýyl ákimi Qanat Smaǵulov aıtyp berdi.

Toǵyz myńnan astam turǵyny bar okrýg quramyna Aqjar aýyly da kiredi. Ondaǵy 6,8 myń gektar egis alqabynyń 3,5 myń gektary sýarmaly aýmaqqa jatady. Sharýalar bıdaı, arpa, júgeri, kartop, qant qyzylshasy, kókónister sekildi túrli daqyldardy ósirýmen aınalysady.

Pılottyq joba aıasynda 258 sharýa 600 mıllıonnan astam teńgege mal satyp alǵan. Qurylǵan kooperatıv óz múshelerine arzandatylǵan baǵamen 3,8 myń túk bede jáne 38 tonna arpa bergen. Omarta men naýbaıhana iske qosyldy. Jylyjaı salynýda, tuqym tazalaýǵa arnalǵan jabdyqty iske qosý úshin joǵary voltty jeliler júrgizilýde.

Áleýmettik salaǵa keler bolsaq, Túımekent orta mektebine kúrdeli jóndeý júrgizilip, mádenıet úıiniń shatyry men jylý júıesi retke keltirilip, eki aýylda da fýtbol alańdary salynǵan. Tórt kósheni ortasha jóndeýge 60 mıllıon teńge baǵyttalyp, bes mıllıon teńgege Aqjar aýylyndaǵy Abaı kóshesine asfalt tóselgen. Osy aýylda ardagerler alleıasy ashylǵan. Nátıjesinde 56 jańa jumys orny qurylǵan.

«Asarlatyp úı salý» jobasymen turǵyn úıge muqtaj bir otbasy baspanaly bolsa, búginde osy ádispen kelesi úıdi salý barysy qarastyrylýda. Ákimdiktiń qoldaýymen az qamtylǵan eki otbasynyń úıine gaz tartylyp berilgen.

Aýyldyqtar kótergen máselelerdiń qatarynda otbasylyq-dárigerlik ambýlatorııa, maldy qoldan uryqtandyrý pýnktin ashý, kóshelerdi jaryqtandyrý jáne taǵy basqalar bar. Turǵyndardy Taraz-Aqsholaq jolyndaǵy kópirdiń jaǵdaıy da alańdatady. Kúshti sý tasqyny kezinde tirekterdiń julynyp ketýi múmkin, al oǵan jaqyn mańda gaz jabdyqtary ornalasqan. Basqa aýyldyq okrýgterdegideı, munda da teri men júndi ótkizý máselesi ózekti kúıinde.

- Bul búkil Qazaqstan boıynsha baıqalyp otyrǵan másele desek, ony keshendi túrde sheshý qajettiligi kún tártibinde. Sonymen qatar, jergilikti shıkizat kóbinese sapa talaptaryna saı kelmeıdi, - dedi Berdibek Saparbaev.

- Jumys joq, bolǵan kúnde de ýaqytsha ǵana jumystar, - dep shaǵymdandy jergilikti turǵyn Dámetken Ospanova. Okrýg ákimi Qanat Smaǵulov Almaty jáne Túrkistan oblystarynyń kásipkerlerimen bıznes júrgizý boıynsha kelissózder júrgizilip jatqanyn jetkizdi.

- Sizderdiń aýyldyq okrýgterińiz eń iri okrýgterdiń biri, oblystyń qol jetkizgen jetistikterinde sizderdiń de úlesterińiz bar. Óziniń tıimdiligin dáleldegen pılottyq jobany iske asyrý qanshama otbasyǵa úlken qoldaý boldy. Árbir otbasy ózderin azyq-túlikpen qamtamasyz etýge, baqshalarynda kókónis egýge, óz isin ashýǵa, memlekettik baǵdarlamalarǵa belsendi qatysýǵa umtylýy tıis.

Sizderge tek memleketke ıek artyp otyrýǵa bolmaıdy. Ózderińiz de bastamashyl bolý kereksizder. Bul ákimdikterge de qatysty, olar áleýmettik nysandardyń qurylysyna belsendi túrde jeke ınvestıtsııalar tartý, jergilikti mektep túlekterimen tyǵyz baılanysta jumys isteý qajet. Uńǵymalardy qalpyna keltirýge nazar aýdaryńyzdar, biz jer asty sý resýrstaryn da paıdalanýymyz kerek. Mal sharýashylyǵynda mal tuqymyn jaqsartýmen aınalysyp, granttar men nesıelerdi paıdalanǵanymyz abzal. Aǵymdaǵy jyly Túımekentte dene shynyqtyrý-saýyqtyrý keshenin salýdy bastaımyz, Aqjar aýylyndaǵy mektepti kúrdeli jóndeýge qarajat qarastyramyz.

Endi halyqty jappaı vaktsınalaý bastalmaq. Vaktsınatsııa qabyldaý asa mańyzdy, búginde ınfektsııamen kúresýdiń basqa joly joq, - dedi Berdibek Saparbaev.