Pılottyq joba aıasynda kooperatıvterge 200-ge jýyq tehnıka berildi – Jambyl oblysy
TARAZ. QazAqparat – «Jambyl oblysy turǵyndarynyń turmystyq tabysyn jaqsartý» jobasy aıasynda alynǵan aýyl sharýashylyq tehnıkalaryn saltanatty tabystaý rásimi ótti. Oǵan oblys ákimi Asqar Myrzahmetov arnaıy qatysyp, pılottyq on bir okrýgte qurylǵan kooperatıvterge 192 tehnıkany tabystady, dep habarlaıdy QazAqparat.
Shara barysynda aımaq basshysy quttyqtaý sóz sóılep, aldaǵy ýaqytta pılottyq joba oblys turǵyndarynyń tabysyn arttyryp qana qoımaı, óńirdiń áleýmettik-ekonomıkalyq damýyna óz septigin tıgizetinin atap ótti.
Atalǵan jobanyń tórtinshi baǵyty - aýyl sharýashylyǵy kooperatıvin qajetti aýyl sharýashylyǵy tehnıkalarymen qamtamasyz etý. Bul baǵytqa 1 070,9 mıllıon teńge qarastyrylyp, ol qarjyǵa kooperatıvterge qajetti tehnıkalardyń 29 túrinen 194 dana tehnıka alynǵan bolatyn. Onyń ishinde 33 traktor, 11 kombaın, 3 KamAZ kóligi jáne taǵy basqa 147 dana agrosalaǵa qajetti tehnıkalar bar.
Atap aıtqanda, Baızaq aýdany, Qostóbe aýylyndaǵy «Qostóbe-2019» kooperatıvine 14 dana, Túımekent aýylyndaǵy «Túımekent-2019» kooperatıvine 18 dana, Jambyl aýdany, Besaǵash aýylyndaǵy «Іske Sát» kooperatıvine 22 dana, Jýaly aýdany, Báıterek aýylyndaǵy «Atameken Bastaý» kooperatıvine 19 dana, Qordaı aýdany, Jańaturmys aýylyndaǵy «Jańaturmys-Birlik» kooperatıvine 19 dana, Merki aýdany, Surat aýylyndaǵy «Surat Damý» kooperatıvine 19 dana, Moıynqum aýdany, Aıdarly aýylyndaǵy «Aıdarly Agro-2019» kooperatıvine 13 dana, Sarysý aýdany, Saýdakent aýylyndaǵy «Saýdakent 2019» kooperatıvine 20 dana, Talas aýdany, Úsharal aýylyndaǵy «Talas-2020» kooperatıvine 18 dana, T.Rysqulov aýdany, Qumaryq aýylyndaǵy «Qumaryq-Taý» kooperatıvine 17 dana, Shý aýdany, Jańaqoǵam aýylyndaǵy «Omar-Shý» kooperatıvine 15 dana tehnıka tabystaldy. Aıta keterligi, bul tehnıkalar Belarýs, Ýkraına, Túrkııa, Reseı, Polsha jáne ózimizdiń otandyq zaýyttardan shyqqan.
Bul aýyl sharýashylyǵy tehnıkalary «Taraz» áleýmettik kásipkerlik korporatsııasy arqyly 5 paıyzben qosymsha kepilsiz lızıngke berilip otyr. Aldaǵy ýaqytta osy tehnıkalardyń kúshimen úı irgesindegi 1 071,7 gektar jáne aýyl syrtyndaǵy 77 362 gektar jerler ıgeriletin bolady.
