Pılottyq joba: 50 myńnan astam jambyldyq turmysyn jaqsartady
TARAZ. QazAqparat – Jambyl oblysynda turǵyndardyń turmystyq tabysyn arttyrý boıynsha pılottyq joba tabysty júzege asýda, dep habarlaıdy QazAqparat oblys ákimdiginiń resmı saıtyna silteme jasap.
Qazirgi ýaqytta 7,2 mlrd teńgege aýyl turǵyndarynyń 2 459 ótinimi qarjylandyryldy. Jalpy joba aıasynda oblystyń 10 aýdanyndaǵy 11 okrýgtiń 7886 aýlasy qamtylýda.
Joba boıynsha pılottyq okrýgterde 11 kooperatıv qurylyp, olardyń shottaryna 125,9 mln teńge somasynda aınalym qarajaty aýdaryldy. Sondaı-aq, aýyl turǵyndarynyń 71,7 myń gektar paı jerlerin tıimdi paıdalaný maqsatynda 230,1 mln teńge bólingen. Bul agrarshylarǵa qajetti tuqymdar men tyńaıtqyshtardy jáne ósimdikterdi qorǵaý úshin hımııalyq quraldardy satyp alýǵa múmkindik berdi. Búginde olar kóktemgi egis jumystaryna tolyq daıyn.
Sonymen qatar sharýashylyqtarda 138,1 mln teńgege jalpy aýdany 2,125 gektardan asatyn 16 jylyjaı qurylysy bastaldy.
Úı mańyndaǵy aýlalardy tıimdi paıdalaný úshin mal sharýashylyǵy boıynsha 40,6 myń bas mal satyp alyndy. Aýyl sharýashylyǵy kooperatıvterine 192 birlik túrli jańa tehnıkaǵa qol jetkizdi. Qazirgi tańda konservi tsehynyń qurylysyn bastaý josparlanýda.
Jaba sheńberinde aýyl turǵyndarynyń óz shaǵyn kásibin ashýǵa da qoldaý kórsetilýde. Bul baǵyt boıynsha quny 64,6 mln teńgege 12 joba qarjylandyrylǵan. Osy qarajat negizinen shaǵyn tsehtardy qajetti qural-jabdyqtarmen jaraqtandyrýǵa baǵyttalǵan.
Aıta keteıik, pılottyq jobany júzege asyrýǵa Jýaly aýdanyndaǵy Aqtóbe aýyldyq okrýginiń turǵyndary belsendi qatysýda. Jergilikti «Atameken bastaý» aýyl sharýashylyǵy kooperatıvinde 207 adam toptasqan. Jaqynda kooperatıv 93 mln teńgeden astam qarjyǵa 12 birlik tehnıkany lızıngke aldy. Munda aýyl sharýashylyǵy ónimderin saqtaýǵa arnalǵan syıymdylyǵy 1800 tonna eki qoıma bar ekendigin aıtyp ótken jón.
Atalǵan okrýg turǵyndary óz isin bastaý úshin jalpy somasy 581 mln teńgege nesıe resimdedi. Aıtalyq, okrýgke qarasty Jańatalap aýylynan Qaıyrǵazy Ábdikerimov alǵan nesıesine bes mln.teńgege 10 jylqy men 25 qoı satyp alyp, jem-shóp qoryn tolyqtyrdy. Aǵasymen birge jobaǵa qatysyp otyrǵan ol 45 gektar jerge arpa egýdi josparlap otyr.
Onyń aýyldasy Qanat Tólegenov te joba aıasynda sharýashylyǵyn keńeıtýge bilek túre kirisken. Ol tıimdi sharttaǵy nesıege qol jetkizgennen keıin, eki jylqy men 50 qoı satyp alyp, jem-shóp túgendegen. Sondaı-aq, bul otbasy jylyna úsh tonnadan astam ónim beretin shaǵyn alma baǵymen aınalysýda.
Jańa jobanyń tıimdiligine Talastyqtar da kóz jetkizýde. Búginde Úsharal aýyldyq okrýginde jylyjaıdyń qurylysy josparlanyp, qarbyz jáne qaýyn, qyzanaq jáne qııar alańdary keńeıtilmek. Jergilikti «Talas-2020 « kooperatıvine 16 birlik aýyl sharýashylyǵy tehnıkasy satyp alynǵan. Kóp uzamaı ondaǵy tehnılar tizbegin kombaın, KamAZ jáne eki tirkeme tolyqtyrmaq.
«Basynda kóptegen turǵyndar bul jobaǵa senimsizdikpen qaraǵany jasyryn emes. Búginde olar onyń nátıjeligine kóz jetkizeýde. Jaqynda taǵy 20 otbasy jobanyń ekinshi baǵyty boıynsha qatysýǵa ótinish bildirdi», - deıdi Talas aýdanynyń ákimi Baqyt Qazanbasov.
Sol sekildi, Moıynqum aýdanyndaǵy Keńes aýyldyq okrýgi turǵyndarynyń da qanatqaqty joba aıasyndaǵy jumystary sátti júrýde. Jańa múmkindikterdi Sarysý aýdanyndaǵy baıqadamdyqtar da tıimdi paıdalaýnda.
Mamandar bul jobanyń oń nátıje beretinine kúmán keltirmeıdi. Olardyń boljamdarynsha jobaǵa qatysatyn árbir aýlanyń tabysy 41,6 myń teńgeden 156 myń teńgege deıin artady. Sonymen qatar, jumyssyzdardy sharýashylyqqa tartý jónindegi kózdelgen mindet te óz sheshimin tappaq. Sondaı-aq, aýyl sharýashylyǵy óndirisiniń kólemi 2021 jyly 4,3 mlrd.teńgeden 9,3 mlrd teńgege deıin ulǵaıady, sút jáne et óńdeıtin kásiporyndardyń júktemesi 20-25 paıyzǵa ósedi dep josparlanýda.
Pılottyq jobany odan ári iske asyrý úshin ár aýdannan eki aýyldyq okrýgten barlyǵy qosymsha 20 aýyldyq okrýg iriktelip otyr.
