Pılottyq joba: Almaty polıtsııasynyń Qyzmet kórsetý ortalyqtarynda qandaı qyzmet alýǵa bolady
ALMATY. KAZINFORM - Almatyda jańa formatta qyzmet kórsetýge baǵyttalǵan alǵashqy polıtsııa pýnktteri pılottyq rejımde iske qosyldy. Polıtsııanyń qyzmet kórsetý ortalyqtary «bir tereze» qaǵıdaty boıynsha jumys isteıdi. Joba Memleket basshysynyń polıtsııa jumysynyń servıstik modeline kóshý jónindegi tapsyrmasy aıasynda Almaty qalasy ákimdiginiń jobalyq keńsesiniń qoldaýymen qalalyq Polıtsııa departamenti júzege asyryp jatyr.
Jobanyń basty maqsaty – qoǵammen ashyq dıalog ornatý jáne turǵyndardyń ótinishterine jedel jaýap berý. Qazirgi ýaqytta qalanyń jeti aýdanynda polıtsııanyń Qyzmet kórsetý ortalyqtary ashylǵan, segizinshisi bıyl qazan aıynda Túrksib aýdanynda ashylady. Ǵımarat qalalyq bıýdjet esebinen satyp alynyp, Polıtsııa departamentine qoldanysqa berildi. Onda ákimshilik, kóshi-qon, ıývenaldyq polıtsııa, ýchaskelik ınspektorlar qyzmet kórsetedi.
«Polıtsııanyń servıstik modeli arqyly azamattar polıtsııa qyzmetine ońaı qol jetkize alady. Sonyń nátıjesinde halyqtyń polıtsııaǵa degen senimi artady dep kútemiz», - dedi Almaty qalalyq PD bastyǵynyń birinshi orynbasary, polıtsııa polkovnıgi Nurlan Almasbekov.
Eki jarym aı ishinde ortalyq qyzmetkerleri qala turǵyndary men qonaqtarynyń 8,5 myń ótinishin óńdedi. Polıtsııanyń qyzmet kórsetý ortalyqtary barlyǵy 55 qyzmet túrin kórsetedi. Ortalyqtar 9:00-den 20:00-ge deıin jumys isteıdi.
Polıtsııanyń qyzmet kórsetý ortalyqtarynyń mekenjaılary:
1. Almaly aýdany, Tóle bı kósh., 273A úı, 1;
2. Áýezov aýdany, Jetisý-3 shaǵyn aýdany, № 5úı, 18;
3. Jetisý aýdany, Aınabulaq shaǵyn aýdany, 40A úı, 2 korpýs, 17;
4. Medeý aýdany, Potanın kósh., 14/17 úı, 108;
5. Bostandyq aýdany, Kóktem 3 shaǵyn aýdany, № 24 úı;
6. Alataý aýdany, Aqbulaq shaǵyn aýdany, Sýatkól kósh., 33/1 úı, 2;
7. Naýryzbaı aýdany, Shuǵyla shaǵyn aýdany, 347.
