Pılottyq aýyl sharýashylyǵy sanaǵy onlaın jáne oflaın túrde júrgiziletin bolady
ASTANA. KAZINFORM — Ulttyq statıstıka bıýrosy (USB) aldaǵy aýylsharýashylyǵy sanaǵy úshin aqparattyq júıeler men qyzmetterdi synaqtan ótkizýde. Úkimette ótken keńeste Premer-Mınıstrdiń orynbasary Serik Jumanǵarınge pılottyq sanaqqa daıyndyq barysy jáne basqa da aspektiler týraly baıandaldy.
USB málimetteri boıynsha, pılottyq sanaq 2024 jyldyń 20 tamyzy men 30 qyrkúıegi aralyǵynda ótedi. Respondentter sanaq paraqtaryn sanaq.gov.kz. mamandandyrylǵan saıtta onlaın rejıminde óz betinshe toltyra alady. Sonymen qatar bıýronyń aýmaqtyq bólimsheleriniń qyzmetkerleri pılottyq joba úshin arnaıy tańdalǵan 54 eldi mekendegi sharýashylyq ókilderine iriktep saýalnama júrgizetin bolady.
Sondaı-aq jıynda mal jáne ósimdik sharýashylyǵy statıstıkasyn ózektendirý máseleleri talqylandy. Buǵan deıin habarlanǵandaı, 2023 jylǵy mal sharýashylyǵy boıynsha derekter jańartylyp, mamandandyrylǵan USB bıýlleteninde jarııalanady. Aýyl sharýashylyǵy vıtse-mınıstri Azat Sultanov ósimdik sharýashylyǵyndaǵy derekterdi ózektendirý jalǵasyp jatqanyn jáne ony tamyz aıynda aıaqtaý josparlanyp otyrǵanyn aıtty.
Keńes qorytyndysy boıynsha vıtse-premer Ulttyq statıstıka bıýrosyna aýyl sharýashylyǵy sanaǵyn ótkizýdiń maqsattary men tártibi týraly boıynsha pılottyq rejım bastalýy qarsańynda túsindirý jumystaryn kúsheıtýdi, sondaı-aq ósimdik sharýashylyǵy týraly málimetterdi ózektendirý jumystaryn sapaly aıaqtaýdy tapsyrdy.
