Pılotsyz kólikter kóp nárseni ózgertedi - Shervın Pıshevar

ASTANA. QazAqparat - Búgin tsıfrlandyrý máseleleri boıynsha respýblıkalyq keńeste «Hyperloop One» teń quryltaıshysy, «Sherpa Capital» venchýrlyq qorynyń basqarýshy dırektory Shervın Pıshevar kólik óndirisiniń bolashaǵyna boljam jasady, dep habarlaıdy QazAqparat tilshisi.

«Qazirgi kezde kólikti pılotsyz júrgizý tehnologııasy bar. Mamandar ony qysqa ýaqyttyń ishinde oılap shyǵardy. Demek, bolashaqta pılotsyz kólikter qoldanysqa shyqsa, qalalardyń sáýletin ózgertýge týra keledi. Sebebi kólik júrgizýshisi kerek bolmaıdy. Rýldy da alyp tastaıdy. Negizi rýl adamnyń mıy men mashınanyń arasyndaǵy ınterfeıs ispetti. Sonyń barlyǵy artta qalady. Mashınalardyń dızaıny ózgeredi. Kóshelerdiń dızaıny ózgeredi. Jalpy bolashaqta kúrdeli ózgerister bolady», - deıdi Pıshevar. Kezinde ol óziniń venchýrlyq qory arqyly «Uber» kompanııasyn qarjylandyrǵan.

Aıta keteıik, búgingi keńeske QR Prezıdenti Nursultan Nazarbaev tóraǵalyq etti. Sol jerde BitFury Group-tyń jetekshisi Valerıı Vavılov blokcheınniń basty artyqshylyǵy jaıynda aıtyp berdi.  Al Reseıdiń baılanys jáne buqaralyq kommýnıkatsııalar mınıstri Nıkolaı Nıkıforov tsıfrlyq tehnologııalardy birlesip damytýǵa shaqyrdy .