Pıketterdi kez kelgen jerde ótkize berýge ruqsat beriledi –mınıstr

NUR-SULTAN. QazAqparat – QR Aqparat jáne qoǵamdyq damý mınıstri Dáýren Abaev Májilistiń ekinshi oqylymynda maquldanǵan eldegi beıbit jınalystar týraly zań jobasyna qatysty taǵy bir ret pikir bildirdi, dep habarlaıdy QazAqparat tilshisi.

«Memleket basshysynyń tikeleı tapsyrmasymen bul zań jobasyn ázirledik. Ártúrli alańda óte kóp talqydan ótkizdik. Kóptegen ózgeris engizildi. Sarapshy depýtattar ǵana emes, quqyq qorǵaý salasynyń mamandary, azamattyq belsendiler de óz ózgeristerin engizdi. Álbette qazir zań jobasy aıtarlyqtaı ózgerdi. Alaıda ózgeristerdiń deńgeıin salystyra salýdyń eń qarapaıym joly – zań jobasynyń buryn jáne búgin qalaı bolǵanyn oqı salý ǵana», - dedi Dáýren Abaev «Ashyq dıalog» baǵdarlamasynda.

Mınıstr óz sózin birneshe mysalmen shegeleı tústi.

«Qazir biz uǵymdardyń bárin de aıqyndap aldyq. Beıbit jıyn, pıket, mıtıng, sherý, demonstratsııa, uıymdastyrýshy, qatysýshy – bári aıqyndaldy. Biz halyqaralyq quqyq qorǵaý uıymdarynyń usynystaryn oryndadyq», - dedi ol.

Dáýren Abaev buryn mıtıngterdi tek ákimdikterdiń ruqsatymen ótkizý múmkin bolǵanyn eske saldy.

«Qazir pıketter men jıyndarǵa shyǵý úshin tek bılikke habarlandyrý kerek. Ruqsat alýdyń qajeti joq. Bul – Prezıdenttiń tapsyrmasy boldy. Buryn mıtıng ótkiziletin jerdi máslıhattar belgileıtin. Qazir arnaıy oryndar túsinigi engizilýde. Bul rette Prezıdenttiń tapsyrmasymen negizgi talap – qalanyń syrtynda bolmaýy kerek. Máselen pıketterdi kez kelgen jerge ótkize berýge bolady. Kelesi: zańnyń sıpaty týraly. Negizgi retteý buryn máslıhattardyń qaraýynda edi. Biz tikeleı yqpal etýshi zańdy jasadyq. Buryn 10 kún buryn ótinim berý talaby boldy. Qazir – 5 kún», - dedi ol.

Mınıstr ótinimderdi qaraý mehanızmine de ózgeris engizilgenin, jańa zańda talaptardyń naqty merzimderi naqtylanǵanyn aıtyp ótti.

«Shynymdy aıtsam lıberalızatsııalanǵan atalǵan zańdy túkke turǵysyz etkisi keletin adamdardyń oılaryn túsinemin. Olar da erkindik úshin kúresýshi mártebesin de saqtap qalý kerek. Biraq olar bir mańyzdy jaıdy túsinbeıdi: kózge kórinip turǵan, jaqsarǵan zań jobasyn moıyndamaı olar memleket pen qoǵamnyń dıalogyna zııanyn keltiredi», - dep túıdi Dáýren Abaev.