Pıkassonyń kartınasy aýktsıonda 139 mıllıon dollarǵa satyldy

Pablo Pıkassonyń 1932 jylǵy «Saǵat taqqan áıel» atty úzdik týyndysy 139 mıllıon AQSh dollaryna satyldy, dep habarlaıdy Kazinform VVS-ge silteme jasap. 

Sotheby's dereginshe, Femme a la Montre («Saǵat taqqan áıel») kartınasy bıyl aýktsıonda satylǵan eń qymbat jumys boldy. Sýrette onyń kóptegen kartınasynyń keıipkeri bolǵan frantsýz modeli Marııa-Tereza Valter beınelengen. 

Aýktsıonǵa shyǵarmas buryn sýret 120 mıllıon AQSh dollaryna baǵalandy. Buǵan deıin kartınany óner týyndylary kollektsııasyn jınaýshy marqum Emılı Fısher Landaý 1968 jyly satyp alǵan. Keıinirek ol aty-jóni qupııa adamǵa tıesili boldy. 

Pıkassonyń aýktsıonda satylǵan eń qymbat kartınasy «Aljır áıelderi» dep atalady. Ol 2015 jyly Christie’s aýktsıonynda 179,3 mıllıon AQSh dollaryna satyldy. Al «Saǵat taqqan áıel» baǵasy jaǵynan sýretshiniń ekinshi qymbat kartınasy boldy.