PIK júıesi áleýmettik shıelenisti kúsheıtip barady - QR IDM
ASTANA. QazAqparat - Kópqabatty turǵyn úılerdi basqarýǵa jaýapty Páter ıeleriniń kooperatıvterine elimizdegi azamattar sengisi kelmeıdi! Osy tujyrymǵa nyq bekigen QR Investıtsııalar jáne damý mınıstrligi Úkimettiń qaraýyna turǵyn úı-kommýnaldyq sharýashylyǵy máseleleri boıynsha jańa zań jobasyn usynyp otyr. Atalmysh mınıstrlik nelikten PIK jumysyn jaramsyz dep biledi? Jańa zań jobasy kópqabatty turǵyn úılerdegi turǵyndardyń máselesin qalaı sheshpek? Osy suraqtar týrasynda QazAqparat tilshisi QR IDM-ǵa resmı saýal joldap kórip edi.
Resmı saýalǵa jaýap bergen QR IDM vıtse-mınıstri Qaıyrbek Óskenbaevtyń aıtýynsha, taldaý PIK turǵyn úı qatynastary týraly zańnamanyń jetispeýshiligin paıdalana otyryp, kóp páterli turǵyn úıdi (KTÚ) basqarýdan bólek, ony kútip-ustaý qyzmetterin atqaratynyn kórsetip otyr. Al shyn máninde bul qyzmetterdi PIK jasasqan sharttyń negizinde servıstik qyzmet sýbektileri atqarýy tıis. Vıtse-mınıstrdiń jaýabyna sáıkes, PIK materıaldyq paıda kórý maqsatyn kózdeı otyryp, qoldanystaǵy zańnamanyń normalaryn moıyndamaı, 10-nan astam KTÚ-ge qyzmet jasaıdy.
«Bul rette olarǵa tek bir ǵana aǵymdaǵy shotty ashady. Bul degenimiz bir kondomınıým obektisin kútip ustaý úshin arnalǵan qarajatty jumsaýdyń ashyqtyǵyn joǵaltýǵa ákelip soqty. Sondaı-aq kóptegen jaǵdaılarda PIK árbir kondomınıým obektisine jınaq shottaryn ashpaıdy. Turǵyndardyń formaldyq jınalystary ótkiziledi, jınalǵan jalǵan qoldar negizinde sheshim qabyldanady, óziniń qyzmetteri týraly esepter usynylmaıdy, qaıta taǵaıyndalǵan tóraǵany qaıta saılaýda jańa tóraǵanyń qyzmetke kirisýine qarsylyq bildiredi», - deıdi Qaıyrbek Óskenbaev.
Jaýapqa sáıkes, osy faktorlardyń barlyǵy PIK qyzmetine azamattardyń senimsizdigin týdyrǵan. Sondaı-aq, PIK qyzmeti áleýmettik shıelenistiń kúsheıýine, turǵyn úı-kommýnaldyq sharýashylyǵynyń servıstik qyzmet kórsetý salasyndaǵy shaǵyn jáne orta bıznesti damytýdaǵy kedergilerge ákeledi.
«Qazirgi ýaqytta qalyptasqan turǵyn úı qatynastaryndaǵy júıelerdi reformalaýdyń ótkir qajettiligi týyndap otyr. Turǵyn úı-kommýnaldyq sharýashylyǵy máseleleri boıynsha zań jobasyna PIK ózara qarym-qatynas sýbektilerimen jumystyń tetigin júıelendirý, jınaqtaý esep-shottaryn júıesin jańǵyrtý, úı-jaılar (páterler) ıeleri men basqarý organdary basshylyǵyn jaýapkershilikke tartý negizin belgileý, basqarý organynyń nysandaryn ońtaılandyrý, KTÚ kútip-ustaý servıstik qyzmeti boıynsha damytý úshin jaǵdaılar jasaý usynylady», - deıdi vıtse-mınıstr.
Osyǵan baılanysty QR Investıtsııalar jáne damý mınıstrligi arnaıy zań jobasyn ázirlep, Úkimettiń qaraýyna usynǵan. Atap aıtqanda, zań jobasyna:
- KTÚ-de múlik ıeleriniń, atqarýshy organdardyń, servıstik qyzmet sýbektileriniń, basqarýshy kompanııalardyń jáne memlekettik organdardyń quqyǵyn, mindetteri men jaýaptylyǵyn reglamentteýge múmkindik beretin, kommertsııalyq emes uıymnyń jańa nysany «múliktiń menshik ıeleri birlestigin» (budan ári - MMIB) «bir úı - bir MMIB - bir shot» qaǵıdaty boıynsha qurýdy;
- kondomınıým obektilerin tirkeý tártibin jáne oǵan jer ýchastkesin bekitý rásimderin ońaılatýdy;
- úı-jaı ıeleri tarapynan kondomınımým obektilerin basqarý organdaryn jáne memlekettik organdar men servıstik qyzmetterdiń ózara is-qımylyn jaqsartýdy baqylaýdy qamtamasyz etý úshin TÚKSh biryńǵaı aqparattyq júıesin qurýdy;
- KTÚ kúrdeli jóndeýge qarajattardy turǵyn úı qurylys jınaq júıesine kiretin bankterde jınaqtaýdy;
- turǵyn úı ınspektsııasy organdarynyń ókilettikterin, onyń ishinde áleýmettik ınfraqurylym obektilerindegi qaýipti tehnıkalyq qurylǵylardy qaýipsiz paıdalaný úshin baqylaý jáne qadaǵalaý bóliginde keńeıtýdi qamtamasyz etetin normalar engizilgen.
