PIK jumysynyń aıqyndyǵyn arttyratyn E-Shanyraq biryńǵaı aqparattyq júıesi qurylady
ASTANA. QazAqparat - Múlikti menshiktenýshiler birlestikterin (MMB) qurý jáne E-Shanyraq biryńǵaı aqparattyq júıesin engizý jumystary qalaı júrgiziledi.
Bul týraly «Turǵyn úı-kommýnaldyq sharýashylyǵyn jańǵyrtý men damytýdyń qazaqstandyq ortalyǵy» AQ basqarma tóraǵasy Nursultan Jıenbaev PrimeMinister.kz resmı resýrsynyń alańynda ótken suhbatta aıtty.
N. Jıenbaev elimizde turǵyn-úı kommýnaldyq sharýashylyǵy salasynda aldaǵy ýaqytta bolatyn reforma týraly sóz qozǵady. Onyń aıtýynsha, PIK-ti MMB-men (múlikti menshiktenýshiler birlestikteri) almastyrý týraly zań búginde Parlamentte jáne Komıtetterde talqylanýda.
Eger páter ıeleriniń kooperatıvteri (PIK) qazirgi túsinik boıynsha páterler aıasynda úıdi basqaratyn (úıdiń kireberisterin jınaý/tazalaý) bolsa, onda kommertsııalyq emes uıymnyń jańa formasy - múlikti menshiktenýshiler birlestikteri (MMB) - árbir úıdi basqarýdyń derbes tásilin qarastyrady.
«Sizde úı bar, siz úleskerlik menshikke ıesiz. Sizdiń múlkińiz - tek páter emes, bul - shatyrdyń bir bóligi, jertóleniń, úıdiń bir bóligi. Qazirgi tańda keıbir jertóleler men shatyrlardy PIK paıdalanady, jalǵa beriledi, uıaly antennalar ornatylady, aqshalaı paıda kózi bolyp tur. Degenmen, turǵyndar budan esh paıda kórip otyrǵan joq. Keı jaǵdaılarda sýǵa nemese elektr kózine artyǵymen tóleıdi. Kóptegen buzýshylyqtar oryn alýda. Olar bul ózderiniń ortaq múlki ekenin kórgen kezde, oǵan barlyǵy ıelik etetin bolady. Basqarýshy kompanııa túsken aqsha esebinen qosymsha qyzmet kórsetetin bolady, qandaı da bir ıgilikti jaǵdaılar jasap, balalar alańdaryn salyp, kúrdeli jóndeýge qosymsha jarna salady. Bul olarǵa neǵurlym tıimdi ári aýqymdy túrde basqarýǵa jol ashady», - dedi N. Jıenbaev.
Búgingi tańda Qazaqstan aýmaǵynda 14,5 myńǵa jýyq PIK jáne basqarýshy kompanııa tirkelgen. «TKSh qazaqstandyq ortalyǵy» AQ basqarma tóraǵasynyń pikirinshe, bul - tym kóp.
«Basqarýshy kompanııalar ekonomıkanyń naqty sektory aıasynda kásibı deńgeıge shyǵýy úshin, olar senimge kire bilýi kerek. Bundaı kompanııalar eń kóbi 300-500 shamasynda bolýy tıis. Olar sapaly qyzmetter usynsa, halyq olarǵa senetin bolady. Búkil álemde osyndaı jaǵdaı qabyldanǵan. MMB - úıdi basqarýdyń óte jaqsy quraly. Adamdar tek páterge emes, jalpy úıge jaýapty ekenderin túsinýi kerek», - dedi N. Jıenbaev.
Sonymen qatar, ol búgingi PIK-ter ózgertilýi kerek ekenin atap ótti.
«Olardyń eń tabystylary men myqtylary osy jumysty áldeqashan qolǵa aldy dep oılaımyn. Men bul jaǵdaıdy baqylaýǵa aldym. Qaraǵandyda PIK-tiń basqarýshy kompanııaǵa túrlenýi sekildi tamasha mysaldar bar. Qazirgi kúni onyń basqarýynda 100-den astam úı bar. Turǵyndardyń barlyǵy baqytty deýge bolady, jumysqa kóńilderi tolady, eshqandaı shaǵymdary joq. Іlgerileý bar. Biz jańa shynaıylyqtarǵa, tsıfrlyq alańǵa beıimdelýimiz kerek. Tsıfrlandyrý júrip jatyr, jańa tehnologııalar engizilýde», - dedi N. Jıenbaev.
E-Shanyraq turǵyn úı qory men turǵyn úı-kommýnaldyq sharýashylyǵynyń biryńǵaı aqparattyq júıesin iske qosý týraly aıta otyryp, N. Jıenbaev búgingi tańda júıeniń pılottyq rejımde jumys istep turǵanyn aıtty. Oǵan 5 myń kóppáterli turǵyn úıler qosylǵan, tsıfrlyq pasporttar bastalǵan, alaıda halyq ázirge bul júıemen jumys istemeıdi.
