PIK-teriniń ornyna basqarýshy kompanııalar keledi - S. Nokın
ASTANA. 13 qańtar. QazAqparat /Arman Asqarov/ - Kóp páterli úılerge qyzmet kórsetý salasynda basqarýshy kompanııalar qurý qajet.
Búgin QR Qurylys jáne turǵyn úı -kommýnaldyq sharýashylyq isteri agenttiginiń keńeıtilgen alqa májilisinde agenttik tóraǵasy Serik Nokın osylaı aıtty.
«Búgingi tańda turǵyn úı qarym-qatynastary salasynda kóp páterli úılerdi qalpynda ustaý máselesine erekshe kóńil bólinip keledi. Osy oraıda biz kóp páterli úılerge qyzmet kórsetetin basqarýshy kompanııalar qurý qajet dep sanaımyz. Sebebi, qazirgi kezde kásibı daıyndyǵy tómen jumyskerleri bar páter ıeleri kooperatıvteri ózderine júktelgen mindetterdi oıdaǵydaı oryndamaı keledi»,- dedi S. Nokın.
Agenttik tóraǵasy atap kórsetkendeı, basqarýshy kompanııalar turǵyn úı nysandarynyń paıdalanylýyna jaýap berse, PIK páter ıeleriniń múddesin qorǵamaq.
S. Nokınniń sózine qaraǵanda, qazirgi kezde agenttik basqarýshy kompanııalardy qurý boıynsha Qaraǵandy qalasynda alǵashqy jobany júzege asyrýǵa kiristi. 2011 jyly osy ispetti jobalar Astana, Aqtóbe, Shymkent jáne Atyraý qalalarynda qolǵa alynbaq.
«Bul jobalardy júzege asyrý úshin «Turǵyn úı -kommýnaldyq sharýashylyqty damytý jáne jańartý qazaqstandyq ortalyǵy» AQ-nyń jarǵylyq qoryn 500 mln. teńgege tolyqtyrý qajet»,-dep atap kórsetti S. Nokın.
