PIB uıymdary sýperkompıýter bazasynda jasandy ıntellekt sheshimderin engizdi
ASTANA.KAZINFORM - Prezıdent Іs basqarmasy júıesinde jasandy ıntellekt tehnologııalary belsendi túrde engizilip jatyr. QR PІB Injenerlik-tehnıkalyq ortalyǵy (ITO) men Materıaldyq-tehnıkalyq qamtamasyz etý basqarmasynyń Injenerlik ortalyǵy (IO) QR JITsDM sýperkompıýteriniń esepteý qýatyn paıdalana otyryp, birqatar jasandy ıntellekt sheshimderin iske asyrdy.
Bıyl PІB Injenerlik-tehnıkalyq ortalyq «Ahýaldyq-taldamalyq keshenge» 12 mamandandyrylǵan JI-agentti engizdi. Intellektýaldy kómekshiler kórsetkishterdi taldap qana qoımaı, analıtıkalyq qorytyndylar qalyptastyrýǵa, táýekelderdi anyqtaýǵa jáne tıisti usynymdar berýge múmkindik beredi.
Intellektýaldy kómekshiler PІB uıymdarynyń negizgi qyzmet baǵyttaryn qamtıdy. Olardyń qatarynda kadrlyq protsester, medıtsınalyq uıymdardyń kórsetkishteri, memlekettik satyp alý, avıatsııalyq jáne avtomobıl kóliginiń jumysy, tsıfrlyq ınfraqurylymdy damytý, Prezıdent teleradıokesheniniń, Prezıdent ortalyǵynyń, Şýchınsk-Býrabaı kýrorttyq aımaǵynyń, Sanıtarııalyq-epıdemıologııalyq saraptama ortalyǵynyń jáne basqa da uıymdardyń qyzmeti bar.
Sonymen qatar árbir JI-agenttiń ózine tán mamandanýy bar. Máselen, «Adamı resýrstar» agenti shtattyń jasaqtalý deńgeıin, kadrlardyń turaqtamaýyn, oqytý tıimdiligin, kadr rezerviniń damýyn jáne basqa da kórsetkishterdi baqylaýǵa kómektesip, yqtımal táýekelder men aýytqýlardy der kezinde anyqtaýǵa múmkindik beredi. Aldaǵy ýaqytta Injenerlik-tehnıkalyq ortalyq aýdıt, býhgalterlik esep, quqyqtyq súıemeldeý, qaýipsizdik, jóndeý jáne tehnıkalyq qyzmet kórsetý, memlekettik satyp alý jáne aqyly qyzmetter baǵyttary boıynsha taǵy onǵa jýyq JI-agentti engizýdi josparlap otyr.
Alaıda analıtıka jasandy ıntellekt qoldanylatyn jalǵyz baǵyt emes. Bıylǵy maýsym aıynda PІB MTQB Injenerlik ortalyǵy AI Code Review – baǵdarlamalyq kodty avtomattandyrylǵan tekserýge arnalǵan ıntellektýaldy júıeni engizdi.
Bul júıe baǵdarlamalyq kodtyń ishki ázirleý standarttaryna sáıkestigin taldaıdy, yqtımal qateler men osal tustardy anyqtaıdy, sondaı-aq aqparattyq qaýipsizdik talaptarynyń saqtalýyn tekseredi. Sonyń nátıjesinde ázirleýshiler keri baılanysty jedel alyp, ýaqytyn rýtınalyq tekserýlerge emes, sheshimderdiń arhıtektýrasyn jetildirýge jáne kúrdeli ınjenerlik mindetterdi oryndaýǵa jumsaı alady.
AI Code Review júıesiniń basty ereksheligi – onyń tolyqtaı jergilikti ınfraqurylymda jumys isteýi. Bul baǵdarlamalyq kodtyń syrtqy servısterge jiberilýine jol bermeıdi jáne GPT, Claude nemese Cursor sııaqty jalpyǵa qoljetimdi jasandy ıntellekt servısterin paıdalanýmen salystyrǵanda aqparattyq qaýipsizdiktiń anaǵurlym joǵary deńgeıin qamtamasyz etedi.
Aıta ketý kerek, jasandy ıntellekt mamandardy almastyrmaıdy, kerisinshe olardyń tıimdi kómekshisine aınalady. Ol kúndelikti qaıtalanatyn jumystardy óz moınyna alyp, qyzmetkerlerdiń kásibı tájirıbe, saraptamalyq baǵalaý jáne basqarýshylyq sheshim qabyldaýdy talap etetin mindetterge kóbirek kóńil bólýine múmkindik beredi.
Prezıdent Іs basqarmasy júıesinde jasandy ıntellekt sheshimderin engizý Qazaqstan Prezıdenti jarııalaǵan Tsıfrlandyrý jáne jasandy ıntellekt jyly aıasynda júzege asyrylyp jatyr.
Qazaqstannyń elektr júıesin basqarýda jasandy ıntellekt qoldanyla bastaǵanyn jazǵan edik.
