Pıanısterdiń «ASTANA PIANO PASSION» І Halyqaralyq festıval-baıqaýyna ótinimder qabyldaý bastaldy
ASTANA. 12 qańtar. QazAqparat - 2013 jyldyń 10 naýryzyna deıin jalǵasatyn jasóspirim pıanısterdiń «Astana Piano Passion» І Halyqaralyq festıval-baıqaýyna qatysý úshin ótinimder qabyldaý bastaldy.
Elordanyń resmı saıtynyń málimetine qaraǵanda, jasóspirim pıanısterdiń «Astana Piano Passion» І Halyqaralyq festıval-baıqaýy 2013 jylǵy 10-16 mamyr aralyǵynda Astana qalasynda ótedi.
Baıqaýdyń uıymdastyrýshylary - Astana qalasynyń ákimdigi, «Accordi di Astana» qoǵamdyq qory bolyp tabylady. Baıqaýdyń kórkemdik jetekshisi jáne qurmetti tóraǵasy - Reseı halyq ártisi Denıs Matsýev.
Baıqaýǵa 18 jasqa deıin jasóspirimder qatysady. Júlde qory - 50.000 AQSh dollary. Jas oryndaýshylarǵa basqa da materıaldyq qoldaýlar kórsetiledi. Atap aıtqanda, Astana qalasy ákiminiń atynan eki arnaıy júlde, baıqaýdyń kórkemdik jetekshisi atynan arnaıy júlde: Frantsııanyń Ansı qalasyndaǵy «Crescendo» jáne «Annecy Classic» festıvalderine baryp, qatysý joldamasy; Reseıdiń Irkýtsk qalasyndaǵy «Baıkaldaǵy juldyzdarǵa» barý; Sýzdal qalasyndaǵy jazǵy lagerge barý joldamasy, sondaı-aq, Qazaq kompozıtorynyń týyndysyn úzdik oryndaý júldesi. Sondaı-aq, baıqaýda І oryn alǵan qatysýshylardyń pedagogtary úshin de júlde taǵaıyndalǵan.
Іrikteý týryn Astanada arnaıy qurylǵan komıssııa 10 naýryz ben 30 naýryz aralyǵynda ótkizedi. Baıqaýǵa qatysýshylar irikteý týrynyń qorytyndysy boıynsha anyqtalady.
