Phygital basketbolda jeńis qalaı anyqtalady: Bas tóreshi jańa tártiptiń ereksheligin túsindirdi
ASTANA. KAZINFORM – «Bolashaq oıyndary - 2026» aıasynda ótip jatqan phygital basketbol jarysynda jeńimpaz tek alańdaǵy oıynmen emes, tsıfrlyq kezeńdegi nátıjemen de anyqtalady. Bul týraly jarystyń bas tóreshisi Vıacheslav Dıachenko málimdedi.
Onyń aıtýynsha, phygital basketbol eki kezeńnen turady: aldymen komandalar basketbol sımýlıatorynda baq synasa, keıin sol qurammen dástúrli basketbol alańyna shyǵady.
– Aldymen komandalar Joy City basketbol sımýlıatorynda 19 upaıǵa deıin nemese 10 mınýt boıy oınaıdy. Odan keıin bes mınýttyq qyzdyrý ýaqyty beriledi de, sol komandalar 7 mınýttyq dástúrli formatta fızıkalyq alańda kezdesedi, – dedi bas tóreshi.
Jarystyń qorytyndy esebi eki kezeńniń nátıjesi boıynsha shyǵarylady. Komanda jalpy 39 upaıǵa birinshi bolyp jetse jeńiske jetedi. Al eki upaılyq dál soqqymen 40 upaı jınasa da jeńimpaz dep tanylady. Eger negizgi ýaqyt aıaqtalǵan kezde esep teń bolsa, jeńimpaz aıyp dobyn oryndaý arqyly anyqtalady.
Vıacheslav Dıachenkonyń sózinshe, phygital basketboldaǵy fızıkalyq oıyn úshke úsh basketbolyna uqsaıdy. Sondyqtan oıynshylar arasyndaǵy baılanys pen kúres klassıkalyq kádimgi basketbolǵa qaraǵanda joǵary.
– Bul matchta komandalar kelesi kezeńge joldama úshin oınady. Jeńilgen komanda týrnırmen qoshtasady. Sondyqtan eki ujym da barynsha kóp upaı jınaýǵa tyrysty, – dedi ol.
Bas tóreshiniń aıtýynsha, bul jarysqa álemdegi eń úzdik phygital basketbol komandalary jınalǵan.
– Eger dál osy dıstsıplına týraly aıtsaq, munda álemniń eń myqty komandalary óner kórsetip jatyr. Maýsym aıyndaǵy irikteý týrnırimen salystyrǵanda deńgeı áldeqaıda joǵary, – dedi tóreshi.
Vıacheslav Dıachenko phygital basketbol erejelerin ázirleýge ózi qatysqanyn aıtyp, sondyqtan arnaıy qaıta daıarlyqtan ótýdiń qajeti bolmaǵanyn jetkizdi. Qazirgi ýaqytta tóreshiler korpýsynda barlyǵy 14 maman jumys isteıdi. Onyń ishinde 6-y fızıkalyq alańda, úsheýi tsıfrlyq kezeńde tórelik etedi.
Tsıfrlyq kezeńdegi tóreshiler oıynshylardyń óz akkaýnttaryn paıdalanýyn, tyıym salynǵan baǵdarlamalar men qosymsha qurylǵylardy qoldanbaýyn, qarsylastarǵa kedergi keltirmeýin baqylaıdy. Al oıynnyń negizgi erejeleri avtomatty túrde júıemen esepteledi.
Bas tóreshiniń aıtýynsha, tsıfrlyq kezeńde de tártip buzýshylyqtar kezdesedi. Kóbine olar sporttyq emes minez-qulyq pen beıádep sóz qoldanýǵa baılanysty bolady.
– Eger oıynshy tsıfrlyq kezeńde eskertý alsa, ol fızıkalyq kezeńge de áser etedi. Demek dál sondaı tártip buzýshylyq qaıtalansa, oıynshy tehnıkalyq fol alady, – dedi Vıacheslav Dıachenko.
Týrnırdiń formatyna sáıkes, alǵashqy matchta jeńilgen komandalar ózara kezdesip, jarysty jalǵastyrý múmkindigi úshin baq synaıdy. Al jeńimpazdar týrnırlik kesteniń joǵarǵy bóliginde ózara jaryspaq. Jartylaı fınaldar 2 tamyzda ótse, úshinshi oryn úshin match pen fınal 3 tamyzǵa josparlanǵan.
Eske sala keteıik, elordada «Bolashaq oıyndary – 2026» týrnıriniń ashylý rásimi ótken edi.
Bul jarys 29 shilde men 9 tamyz aralyǵynda ótedi. Jarysqa 34 elden 800-den astam sportshy qatysyp jatyr.
Sondaı-aq Memleket basshysy Qasym-Jomart Toqaev týrnırdiń resmı ashylý rásiminde sóz sóılegen bolatyn.
