Phygital basketbol: Qazaqstandyq GTB KZ komandasy jarysty aıaqtady

Matchtyń alǵashqy, tsıfrlyq kezeńinen keıin qazaqstandyq komanda qarsylasyn qýyp jetýge tyrysqanymen, qorytyndy esepte úsh upaı aıyrmasymen jeńilis tapty.

Handsome MDMX komandasynyń oıynshysy Tszıan Chjenıan (Jiang Zhengyang) qarsylastyń osal bolmaǵanyn aıtyp ótti.

– Qazaqstan quramasy óte tartysy oınady. Biz óz josparymyzdy saqtap, sońyna deıin kúresýge tyrystyq. Aqyrynda jeńiske jettik. Qazaqstandaǵy atmosfera óte keremet. Mundaı elde oınaý bizge úlken áser qaldyrdy, – dedi ol.

GTB KZ oıynshysy Eset Jarqylov jankúıerlerdiń úmitin aqtaı almaǵandaryna ókinish bildirdi.

– Ókinishke qaraı, jankúıerlerdiń úmitin aqtaı almadyq. Biraq oıynnyń aty oıyn, tartysty kezdesý boldy. Eń qıyn kezeń tsıfrlyq bólim boldy. Bizde óz josparymyz bar edi, alaıda ol júzege aspady. Bul qarsylastyń jaqsyraq daıyndalǵanyn kórsetti, – dedi sportshy.

Onyń aıtýynsha, fızıkalyq kezeńde komanda óz múmkindigin kórsetýge tyrysqan.

– Qytaı komandasymen de, basqa qarsylastarmen de alańdaǵy oıynǵa senimdi shyqtyq. Esepti qýyp jetemiz dep oıladyq. Biraq sál ǵana jetpeı qaldy, – dedi Eset Jarqylov.

Sportshynyń sózinshe, komanda endi kelesi halyqaralyq jarystarǵa daıyndyqty kúsheıtpek.

– Aldaǵy irikteý týrnırleri ótedi. Kelesi Future Games Brazılııada uıymdastyrylady. Soǵan deıin bir jyl boıy tyńǵylyqty daıyndalamyz. Ásirese tsıfrlyq baǵyttaǵy sheberligimizdi arttyrýymyz qajet, – dedi ol.

Aıta keteıik, buǵan deıin, Bas tóreshi Phygital basketboldyń erejesin túsindirgen bolatyn.