Phýkette Qazaqstan azamattary mingen qaıyq apatqa ushyrady

ALMATY. KAZINFORM — Taılandtyń Phýket aralynda Qazaqstan azamattary mingen qaıyq apatqa ushyraǵany belgili boldy. Muny Kazinform tilshisine Syrtqy ister mınıstrliginiń baspasóz qyzmeti rastady.

Vedomstvonyń málimetinshe, qaıyqta Qazaqstannyń segiz azamaty otyrǵan. Zardap shekken barlyq adamǵa jedel medıtsınalyq kómek kórsetildi.

Qazirgi ýaqytta Qazaqstannyń úsh azamaty aýrýhanaǵa jatqyzylyp, dárigerlerdiń baqylaýynda.

— Olardyń jaǵdaıy turaqty. Shyǵyndardy saqtandyrý kompanııasy óteıdi, — delingen habarlamada.

Syrtqy ister mınıstrligi konsýl azamattarmen turaqty baılanys ornatyp, olarǵa qajetti qoldaýdy kórsetip otyrǵanyn málimdedi.

Eske salaıyq, 2026 jylǵy 11 qańtarda Phýket mańyndaǵy Andaman teńizinde qaıyq pen balyq aýlaıtyn keme soqtyǵysqanyn jazǵanbyz. Oqıǵa saldarynan 23 týrıst jaraqat alyp, 18 jastaǵy reseılik kóz jumǵanyn habarlaǵanbyz.