Philip Morris Qazaqstanda jańa zerthanaǵa ınvestıtsııa salmaq
ASTANA. KAZINFORM — Premer-mınıstrdiń orynbasary — ulttyq ekonomıka mınıstri Serik Jumanǵarın TMD jáne Ortalyq Azııa aımaǵy boıynsha Philip Morris International prezıdenti Marko Marıottımen kezdesti.
Kezdesýde Serik Jumanǵarın kóp jylǵy yntymaqtastyǵy men Qazaqstan ekonomıkasynyń damýyna qosqan úlesi úshin kompanııaǵa alǵys aıtty.
— Philip Morris Kazakhstan kóp jyldan beri elimizdiń iri sheteldik ınvestorynyń biri. Biz kompanııanyń jumys oryndaryn ashýǵa, óndiristik áleýetti damytýǵa, zamanaýı tehnologııalardy engizýge jáne Qazaqstannyń eksporttyq múmkindigin nyǵaıtýǵa qosqan úlesin joǵary baǵalaımyz, — dep atap ótti vıtse-premer.
Kezdesý barysynda taraptar quramynda nıkotın bar jáne nıkotın joq ónimderge arnalǵan Eýrazııalyq ekonomıkalyq odaqtyń tehnıkalyq reglamentiniń jobasyn ázirleýdi talqylady.
Serik Jumanǵarın Qazaqstan EAEO sheńberinde tehnıkalyq retteýdiń biryńǵaı tásilderin qalyptastyrýdy qoldaıtynyn atap ótti. Sonymen birge ázirlenip jatqan tehnıkalyq reglament Odaqqa múshe memleketterdiń ulttyq zańnamasy erekshelikterin eskerýge, halyq densaýlyǵyn qorǵaýdyń joǵary deńgeıin qamtamasyz etýge jáne quramynda nıkotın bar ónimderdiń ártúrli sanatyn retteý kezinde quqyqtyq qaıshylyqtar týǵyzbaýy tıis.
Qazaqstan Respýblıkasynyń halyq densaýlyǵyn qorǵaý salasyndaǵy qoldanystaǵy zańnamasyn, sondaı-aq eldiń temekini baqylaý salasyndaǵy halyqaralyq mindettemelerin saqtaý qajettiligine erekshe nazar aýdaryldy. Osyǵan baılanysty «Halyq densaýlyǵy jáne densaýlyq saqtaý júıesi týraly» Qazaqstan Respýblıkasynyń Kodeksinde shekpeıtin temeki ónimderin, elektrondyq tutyný júıelerin (veıpterdi), olar úshin hosh ıistendirgishter men suıyqtyqtardy ákelýge, óndirýge, satýǵa jáne taratýǵa tyıym salý belgilengeni atap ótildi.
Marko Marıottı kompanııanyń Qazaqstanda EAEO, Ońtústik Kavkaz jáne Ortalyq Azııa elderiniń kásiporyndaryna qyzmet kórsetý úshin ónimderdi testileý jáne taldaý boıynsha zamanaýı zerthana qurý josparlary týraly habardar etti. Jobany halyqaralyq standarttarǵa sáıkes kompanııanyń óz ınvestıtsııalary esebinen júzege asyrý josparlanýda.
Kezdesý qorytyndysynda taraptar Eýrazııalyq ekonomıkalyq odaq sheńberinde tehnıkalyq retteý máselesi boıynsha syndarly ózara is-qımyldy jalǵastyrýǵa, qolaıly ınvestıtsııalyq ahýaldy qamtamasyz etýge jáne Qazaqstan Respýblıkasynyń halyq densaýlyǵyn qorǵaý salasyndaǵy ulttyq zańnamasynyń talaptaryn saqtaýǵa múddeliligin rastady.
Aıta ketelik Efes pen Coca-Cola Qazaqstanda 10 myńnan astam jumys ornyn qamtamasyz etedi.
