Phenchhandaǵy Paralımpıada oıyndaryna Qazaqstannan alty atlet qatysady
ASTANA. QazAqparat - QR Ulttyq paralımpıada komıteti Phenchhandaǵy qysqy Paralımpıada oıyndaryna qatysatyn Qazaqstan quramasynyń quramyn bekitti, dep habarlaıdy «SPORTINFORM» SAA atalǵan komıtetke silteme jasap.
Qazaqstan quramasynyń sapyna alty atlet pen bir sportshy-gıd endi. Elimizdiń sportshylary Oıyndarda shańǵy jarysy jáne bıatlon boıynsha synǵa túsedi. Atap aıtqanda, quramadaǵy sportshylardyń qatarynda Aleksandr Kolıadın, Denıs Petrenko, Sergeı Ýsoltsev, Aleksandr Gerlıts, Qaırat Qanafın jáne Jańyl Baltabaeva bar.
Paralımpıada-2018 aıasynda Qazaqstan atletteri eki oqý-jattyǵýdy Germanııada jáne bireýin Reseıde ótkizdi. Daıyndyqtyń qorytyndy kezeńi Talǵarda uıymdastyrylýda.
«Tehnıkalyq baza men jabdyqtarǵa toqtalsaq, bizdiń atletter úshin eń úzdik quraldar satyp alyndy. Osy oraıda atlettiń qajettilikterine qaraı bul jabdyqtar arnaıy daıyndaldy», - delingen QR Ulttyq paralımpıada komıtetiniń habarlamasynda.
Aıta keteıik, Phenchhandaǵy Oıyndarda 80 medal jıyntyǵy sarapqa salynady. Qysqy Paralımpıada oıyndary Phenchhanda 8 naýryzda bastalady.
