Phenchhandaǵy Olımpıada kezinde 25 jylda bolmaǵan aıazdar soǵady
ASTANA. QazAqparat - 2018 jyldyń 9-25 aqpany aralyǵynda Qysqy Olımpıada oıyndaryn qabyldaıtyn Ońtústik Koreıanyń Phenchhan qalasynda kún qatty sýyq bolýy múmkin, dep habarlaıdy QazAqparat «Habar 24» arnasyna silteme jasap.
Mamandardyń aıtýynsha, bul sońǵy shırek ǵasyrdaǵy eń sýyq mezgil bolǵaly tur. Olımpıadanyń ashylý rásiminde aýa temperatýrasy mınýs 7 gradýsqa deıin tómendemek. Alaıda, kúshti jel saldarynan kún budan da sýyq bola túsedi. Onmyńdaǵan sportshy, qala qonaqtary men eriktiler aıazda 5 saǵattaı turýǵa májbúr bolmaq. Al uıymdastyrýshylar bolsa, stadıon mańyna jelden qorǵaıtyn arnaıy áınekter ornatyp, kórermenderge jyly jamylǵylar úlestirmek.
«Bul máseleni túbegeıli sheshý múmkin emes. Tek ýaqytsha sharalar qoldanýǵa bolady. Stadıon ústine shatyr ornatylmaıdy, ony qolǵa alǵannyń ózinde ýaqyt jetpeıdi», - dep atap ótti Olımpıada komıtetiniń múshesi Sım Kı Djýn.
