Phenchhandaǵy Olımpıada aldynda sportshylar 7 000 dopıng-test tapsyrdy

ASTANA. QazAqparat - Phenchhandaǵy 2018 jylǵy qysqy Olımpıadanyń dopıng-baqylaý júıesi barynsha  muqııat júrgiziledi, dep málimdedi Halyqaralyq Olımpıadalyq komıtettiń (HOK) medıtsınalyq departamentiniń basshysy Rıchard Badjett Lozannada (Shveıtsarııa) ótken baspasóz brıfınginde.

 Bul jaıly sport.inform.kz habarlaıdy.

Badjettiń sózine qaraǵanda, ІTA dopıng-testileý táýelsiz uıymy Rojdestvo qarsańynda, qysqy Olımpıada aldynda tolyq kúshpen jumysyn bastaıdy. Osy organ sport álemindegi dopıng baqylaýdyń ózekti máseleleri boıynsha kómektesedi.

2018 jylǵy qysqy Olımpıada oıyndaryna daıyndyq kezeńinde sportshylar, sonyń ishinde qazaqstandyq atletter de bar, jalpy jeti myń test tapsyryp úlgergen. «62 eldiń tórt myń sportshysynan jalpy jeti myń test alyndy, bul Rıo-de-Janeırodaǵy jazǵy Olımpıadanyń aldyndaǵydan 50%-ke kóp degen sóz», - deıdi Badjett.

Aıta keteıik, Qazaqstan Ulttyq Olımpıadalyq komıteti olımpıadalyq qozǵalystyń dopıngke jol bermeý ustanymyn tolyq qoldaıdy.