Phenchhan Olımpıadasyna qaı el eń kóp sportshy aparady

ASTANA. QazAqparat - Ońtústik Koreıanyń Phenchhan qalasynda ótetin XXIII Olımpıada oıyndaryna eń kóp sportshy aparatyn el belgili boldy, dep habarlaıdy QazAqparat.

AQSh-tyń Olımpıada komıteti taratqan málimetterge súıensek, olar Phenchhanǵa Qysqy Olımpıada tarıhynda alǵash ret eń kóp sportshy aparatyn el atanbaq.

AQSh Olımpıadada sporttyń barlyq 15 túrinen baq synaıdy. Jarysqa 242 (107 áıel jáne 135 er adam) sportshy joldama jeńip alǵan.

AQSh komandasynyń qatysýshylary arasynda Olımpıadanyń 37 júldegeri, 10 Olımpıada chempıony bar. Al 139 sportshy Olımpıadaǵa birinshi ret qatysqaly otyr.

Esterińizge sala keteıik, osyǵan deıin Qazaqstan quramasy 57 joldama jeńip alǵany týraly jazǵan bolatynbyz. Qazaqstan sportshylary Olımpıadada sporttyń 9 túrinen el namysyn qorǵaıdy. Tórt jylda bir ótetin baıraqty doda 9-25 aqpan aralyǵynda ótedi.