Phenchhan-2018: Jarystar qandaı stadıondarda ótedi
Sporttyq nysandar bir-birine jaqyn ornalasqan. Olımpıadashylar bir stadıonnan ekinshi sport alańyna jetý úshin bar bolǵany jarty saǵat ýaqyt jumsaıdy. Olımpıadashylar bolsa, Alpensııa, Enphen, Fenıks-Park taý-shańǵy kýrorttaryndaǵy jáne Kannyn qalasyndaǵy qonaqúılerge jaıǵasqan. Al jarystardyń negizgi ortalyǵy bolyp Alpensııa men Kannyn sanalady.
«Alpensııa» bıatlon ortalyǵy (Alpensia Biathlon Centre)
Bıatlon ortalyǵy Alpensııa taý-shańǵy kýrortynyń shekarasynda oryn tepken. Ortalyq bıatlonshylardyń ózara myqtyny anyqtaıtyn alańyna aınalady. Keshen 1998 jyly salynǵan. 2007 jáne 2015 jyldary qaıta kúrdeli jóndeýden ótken. «Alpensııa» bıatlon ortalyǵynda bıatlonnan 2007/2008 jáne 2016/2017 jyldary Álem kýbogy ótse, 2009 jyly álem birinshiliginiń jalaýy jelbiregen.
«Kannyn Oval» (Gangneung Oval)
«Kannyn Oval» - Kannyn qalasyndaǵy konkımen júgirý sportyna arnalǵan jabyq stadıon. Munda Aq Olımpıada barysynda konkımen júgirýden jarystar ótedi. Stadıonda standartty 400 metrlik eki jolaq bar. 8 myń kórermen bir ýaqytta jarysty tamashalaı alady. Keshen quny 36,8 mln dollarǵa baǵalanǵan. «Kannyn Ovaldyń» qurylysy 2014 jyldyń qazanynda bastalyp, 2017 jyldyń qańtarynda qoldanysqa berilgen. Tipti araǵa aı salyp konkımen júgirýden álem birinshiligi aıasynda jekeleı qashyqtyqtar boıynsha jarystar da ótken.
«Alpensııa» shańǵyortalyǵy (Alpensia Cross-Country Centre)
«Alpensııa» shańǵy ortalyǵy Alpensııa taý-shańǵy kýrortty aýmaǵynyń shekarasynda - osy tektes bıatlon ortalyǵynyń janynda ornalasqan. Munda shańǵy jarystary men shańǵy qossaıysynan baq synaıtyn sportshylar synǵa túsedi. Sport alańynyń irgesi 1998 jyly qalanǵan. 2009 jyly qaıta kúrdeli jóndeýden ótip, 2017 jyly olımpıada aldyndaǵy tekseris jarystary aıasynda taý shańǵysynan Álem kýbogy kezeńi ótti.
Kannynmuzaıdyny (Gangneung Ice Arena)
Bul stadıonda mánerlep syrǵanaýdan jáne short-trekten saıystar ótedi. Arenanyń resmı ashylýy 2016 jyldyń 14 jeltoqsanynda ótken. Qurylysyna 85 mln dollar jumsalǵan keshen, bir ýaqytta 12 myń kórermendi syıdyra alady. Olımpıada aldyndaǵy testilik jarystar kezinde bıyl mánerlep syrǵanaýdan Ońtústik Koreıa chempıonaty, tórt qurlyq birinshiligi jáne short-trekten Álem kýbogynyń kezeńi uıymdastyryldy.
«Alpensııa» shana-bobsleı ortalyǵy (Alpensia Sliding Centre)
«Alpensııa» shana-bobsleı ortalyǵy - bobsleı, shana, skeleton trassasy kesheni. Ol Phenchhan ýezine qarasty Dekvalmen eldi mekenindegi Alpensııa kýrorty mańynda oryn tepken. Atalǵan ortalyqtyń qurylysy 2013 jyldyń jeltoqsanynda bastalǵan. Osy jyldyń sońynda qoldanysqa beriledi. Bul keshen 7 myń kórermenge arnalǵan. Qurylysqa jumsalǵan shyǵyn kólemi 122 mln dollarǵa teń. Eń uzyn trassanyń qashyqtyǵy - 2018 metr. Sóre syzyǵy 940 metr bıiktikte ornalassa, máre syzyǵy 800 metr bıiktikte.
«Alpensııa» tuǵyrdan sekirý kesheni (Alpensia Ski Jumping Centre)
Bul keshende shańǵymen tuǵyrdan sekirýden, sondaı-aq snoýbordyń bıg-eır túrinen jáne shańǵy qossaıysynan jarystar ótedi. Keshen 2008 jyly paıdalanýǵa berildi. Alaıda, 2015 jyldyń sáýirinde qaıta jóndeý jasalyp, Olımpıada aıasynda halyqaralyq standarttarǵa sáıkestendirildi. Syıymdylyǵy - 13 myń 500 adam (11 000 otyratyn oryn jáne 2 500 turyp tamashalaıtyn oryn). Keshende K-98 jáne K-125 tuǵyrlary bar. Al Aq Olımpıadadan soń nysan ulttyq jattyǵý jasaý ortalyǵy retinde qoldanylatyn bolady.
Kannyn hokkeı ortalyǵy (Gangneung Hockey Centre)
Kannyn qalasynda ornalasqan muz aıdyny hokkeıden jarystar ótetin negizgi arena. Shanadaǵy hokkeı saıystary da osynda uıymdastyrylady. Arenanyń qurylysy 2014 jyldyń naýryzynda bastalyp, 2017 jyldyń naýryzynda resmı túrde paıdalanýǵa berildi. El bıligi ǵımarat qurylysyna 90 mln dollar jumsaǵan. Syıymdylyǵy - 10 myń adam. 2017 jyly bul ortalyq «A» tobynyń ekinshi dıvızonynda áıelder men jasóspirimder arasynda álem chempıonatyn qabyldap úlgerdi.
Kvandon ýnıversıtetiniń sporttyq arenasy (Kwandong University Gymnasium)
Bul keshen Kvandon ýnıversıtetiniń janynda ornalasqan. 2018 jylǵy Olımpıada kezinde bul nysanda Kannyn hokkeı ortalyǵymen qatar hokkeı jarystary uıymdastyrylady. 2014 jyly negizi qalanǵan keshen 2017 jyldyń aqpanynda kelýshilerge esigin aıqara ashty. Syıymdylyǵy - 6 myń adam. 2017 jyly Kvandon ýnıversıteti arenasy testilik jarystar aıasynda «A» tobynyń ekinshi dıvızonynda áıelder men jasóspirimder arasynda álem chempıonatyn qabyldady.
Kannyn kerlın ortalyǵy (Gangneung Curling Centre)
Bul keshen 2018 jylǵy qysqy Olımpıada oıyndary barysynda jabyq muz aıdynyna aınalyp, kerlıng jarystaryn qabyldaıdy. Arena Kannyn shaharyndaǵy jaǵalaýda boı kótergen. Bul ortalyqta 1999 jyly qysqy Azııa oıyndary kezinde de saıystar, mánerlep syrǵanaýdan halyqaralyq týrnırler (2005, 2011), short-trek (2007) pen kerlıngten álem chempıonattary (2009) ótken. 1998 jyly qurylysy aıaqtalǵan nysan 3,5 myń kórermenge arnalǵan.
Bokvang ekstrım-saıabaǵy (Bokwang Phoenix Park)
Bul Olımpıada kesheni eki bólikke bólingen. Birinde frıstaıldan, ekinshisinde snoýbordtan jarystar ótkiziledi. «Frıstaıl ortalyq» 4 myń adamǵa laıyqtalsa, snoýbord jarystaryn 6 250 adam tamashalaı alady.
Enphen taý-shańǵy ortalyǵy (Yongpyong Alpine Centre)
Enphen taý-shańǵy bazasy Ońtústik Koreıanyń qary eń kóp jerine salynǵan. Álemniń talaı beldi sportshysy baq synaǵan bul oryndy jergilikti turǵyndar eldiń Mekkesi sanaıdy. Munda úkimettik deńgeıdegi kóptegen is-shara, atap aıtsaq, 42 el qatysýymen slalom, bıatlon, sprınt, snoýbord jarystary uıymdastyrylǵan. Sonymen qatar Koreıa Respýblıkasynyń Mádenıet, sport jáne týrızm mınıstrliginiń uıymdastyrýymen qysqy sport túrleri boıynsha ulttyq festıvaldar ótkizilgen. Taý-shańǵysy bazasynyń qurylysyna sheteldik ınvestorlardyń 84 mln dollar qarjysy quıylsa, Olımpıada qarsańynda taǵy 50 mln dollar jumsaldy. Syıymdylyǵy 18 myń adamdy quraıtyn keshende taý-shańǵysynan týrnırler ótedi.
Chonson taý-shańǵy kesheni (Jeongseon Alpine Centre)
Chonson Olımpıada oıyndary kezinde ekinshi taý-shańǵy ortalyǵy bolyp tabylady. Bul kýrortty qalashyq Pýkphenmen aýmaǵynda ornalasqan. 2018 jylǵy Aq Olımpıada aıasynda munda jyldam syrǵanaý, sýper-gıgant jáne taý-shańǵy kombınatsııasynan jarystar uıymdastarylady. Oǵan 18 myń adam sııady. Erler arasynda jyldam syrǵanaý 1433 metrlik bıiktikte bastalyp, uzaqtyǵy 3,5 shaqyrymǵa jalǵasady. Áıelder arasyndaǵy syn 1380 metrden bastalyp, qashyqtyǵy 2,5 shaqyrymǵa jetedi. Máre syzyǵy 540 metr bıiktikte ornalasqan. Degenmen, ekologııany qorǵaý boıynsha keıbir uıymdar Chonsonda jarystar ótkizýge qarsy shyǵýda. Sebebi, mundaǵy orman alqaptary qoryq retinde qorǵaýǵa alynǵan.
Phenchhan olımpıada stadıony (Pyeongchang Olympic Stadium)
Munda Olımpıada oıyndary kezinde eki aýqymdy is-shara uıymdastyrylady. Onyń biri Qysqy oıyndardyń ashylýy bolsa, ekinshisi jabylý saltanattary. Sonymen qatar munda Paralımpıada oıyndary ótedi dep josparlanǵan. Ýaqytsha jasalǵan stadıon Alpensııadan eki shaqyrym jerde ornalasqan. Bul stadıonǵa 35 myń kórermen sııady. Sondaı-aq munda júldegerlerdi marapattaý rásimi ótedi.
